Дэлхийн загварын ертөнцийн хамгийн сүр дуулиантай, нижгэр нь “Victoria’s Secret Show” гэдэгтэй маргах хүн үгүй. Хамгийн үзэсгэлэнтэй, хамгийн чадварлаг загвар өмсөгчдөөс бүрдсэн тус шоуг олон хүн үзэхийг хүсдэг. Victoria’s Secret-ийн сахиусан тэнгэр, саяхан олон жил хамт амьдарсан нөхрөө хуурсан хэрэгт хэсэгтээ л хэвлэлийн баатар болсон Хайди Клумын "People" сэтгүүлд өгсөн ярилцлагыг хүргэе.

Тэрбээр загвар өмсөгчөөс гадна жүжигчин, телевизийн хөтлөгч, продюсер, загвар зохион бүтээгч болон дуучин гээд олон мэргэжилтэй. Бурхан түүнд гоо үзэсгэлэнгээс гадна олон талын авъяас заяажээ. Хайди 1973 оны зургадугаар сарын нэгэнд Баруун Германы Бергиш-Гладбах хотод төрсөн өдгөө 39 настай юм. Хэдийгээр 39 гэдэг загвар өмсөгч нарын хувьд “хөгшин нас” гэдэг ч хүн өөртөө санаа тавибал нас гэдэг зүйл зүгээр л тоо юм гэдгийг тэрбээр өөрийн биеэр батлан харуулж, одоо хүртэл загварынхныг бишрүүлсээр байна.

    -Өөрийнхөө хүрсэн өндөрлөгт үлдэхийн тулд та юу хийдэг вэ?

-Хамгийн гол нь хөдөлмөрч байх нь чухал. Би өөрийгөө олон төрлийн ажилд сайн гэж боддог. Сар бүрийн эхэнд би шинэ дэвтэр дээр өөрийн ажлын талаар хөтөлдөг. Үүндээ уулзалтууд, шинэ санаа зэрэг ажлын талаар бүх зүйлээ бичдэг юм.

-“Victoria’s Secret” шоуны од нь болж гялалзсан нууцаасаа хуваалцахгүй юу?

-Сандрахгүй байж, үзэгчдийн сэтгэлийн хөөрлийг хэрхэн дээд цэгт нь хүргэх, мэдээж сахиусан тэнгэрийн далавчтай алхаж сурах зэргийг дурдмаар байна. Хамгийн гол нь энэ бол хувцас загвараасаа илүүтэй үзэгчдэд шоу гэдгийг утгаар нь мэдрүүлэх юм. Энэ бүхнийг хэрхэн хийж гүйцэтгэхээ мэдэж байгаа тохиолдолд “од” болж гялалзах бол ердийн зүйл шүү дээ.

-Та загварын өндөр мэдлэгтэй хүмүүсийн нэг. Таны бодлоор үргэлж халуухан төрхийг бий болгодог ямар хувцас байдаг вэ?

-Миний бодлоор бариу хар даашинз, маш өндөр өсгийтэй гутал үргэлж дур булаам харагдуулж чаддаг. Ийм хувцас өмссөн бүсгүйчүүд ямар ч эрийн нүдийг хужирлуулж чадна гэдэгт итгэлтэй байна. Яагаад хар өнгө вэ гэвэл хар бол “хаан” өнгө шүү дээ. Түүнчлэн аливаа гоёл чимэглэлтэй үргэлж зохицдог. Хүсвэл та дээгүүрээ хүрэм өмсч болно гээд л олон янзаар хувцаслаж болдог.

-Та өөрийгөө ямар үед хамгийн үзэсгэлэнтэй гэж мэдэрдэг вэ?

-Бусад бүсгүйчүүдийн адил нүүрээ будуулж, үсээ засуулсныхаа дараа мэдээж өөрийгөө үзэсгэлэнтэй гэж мэдэрдэг. Түүнээс гадна гэр бүлтэйгээ байх үедээ түүнээс ч илүү сайхан болсон мэт сэтгэгдэл төрдөг шүү.

-Та өглөө хамгийн түрүүнд юу хийж, орой унтахаасаа өмнө юу хийдэг вэ?

-Өглөө хамгийн түрүүнд том хүүгээ сургуульд нь хүргэж өгнө. Харин орой унтахаасаа өмнө хүүхдүүдээ бүгдийг нь чанга гэгч нь тэвэрдэг дээ.

    -Хүүхдүүдийнхээ хөгжилтэй дурсамжаас хуваалцаач?

-Нэг өдөр бид хүүхдүүдтэйгээ усан санд тоглож байлаа. Би охиноосоо “Миний охины шээс хүрч байна уу” гэсэн чинь “Санаа зоволтгүй ээ. Би усан санд хөнгөрчихсөн. Хэн ч мэдээгүй” гэдэг байгаа /инээв/.

-Та хүний ээж болсноор юу сурч мэдэв?

-Хүмүүс загвар өмсөгчид өнгөнд шуналтай энэ тэр гэдэг шүү дээ. Олны үг ортой. Би эх болохоосоо өмнө үнэхээр сайхан байшин, машин, даашинз, гутал, бөгж зүүлтэнд дурладаг байлаа. Одоо надад хүүхдүүдээс минь өөр үнэтэй зүйл байхгүй.heidiklum300

-Стресстсэн үедээ хэрхэн алжаалаа тайлдаг вэ? Өөртэйгээ ярилцдаг уу?

-Ядарсан үедээ би саунд ордог. Аль болох хүүхдүүдтэйгээ илүү цагийг өнгөрөөдөг. Өөртэйгээ ярилцдаггүй хүн байдаггүй байх. Гэхдээ миний биеийн нөгөө тал нь болсон нөхөртэйгээ асуудлынхаа талаар ярилцдаг.

-Та сайн найз уу?

-Тийм гэж боддог. Миний хамгийн сайн найз Германд байгаа. Найз минь жирэмсэн, завтай болох болгондоо найзтайгаа уулзахыг боддог.

-Найз нартайгаа байгаа үедээ юу хийх дуртай вэ?

-Мэдээж дэлгүүрээр хэсэх шүү дээ. Бүсгүйчүүдийн халуун дотно яриаг өрнүүлээд л кофений мухлагт сууж, элдэв хов жив ярилцах ч сайхан шүү /инээв/.