Нэгдүгээр ангид орсон хүүхдүүд өнгөрсөн долоо хоногоос эхлэн цагаан толгойн баяраа тэмдэглэж эхэлсэн. Сургуульд орсон хүүхэд бүр цагаан толгойн баяраа хийдэг уламжлалтай. Тэгтэл өнгөрсөн амралтын өдөр нийслэлийн 23 сургуулийн нэгдүгээр ангийн хүүхдүүд цагаан толгойн баяраа хийхээр бэлдэж байсан ч захирлынхаа шийдвэрээс болоод чадаагүй гэнэ. Учир нь цагаан толгойн баяраа тэмдэглэхээр хүүхэд бүрээс 100.000 төгрөг цуглуулахаар эцэг эхийн зөвлөл ажиллажээ.

Зарим эцэг эхчүүд энэ үйлдлийн талаар холбогдох яаманд нь гомдол мэдүүлсэн байна. Гомдолын дагуу яамныхан сургуулийн захирлыг дуудаж эцэг эхчүүдээс ийм их мөнгө татаж баяр хийж болохгүй. Даруухан хэмжээнд тэмдэглэхийг сануулжээ. Үүнд дургүйцсэн сургуулийн захирал бүх багш нараа цуглуулаад энэ жил манай сургууль цагаан толгойн баяр гэж хийхгүй. Элдэв хэл ам хийж явдаг эцэг эхчүүд нь өөрсдөө хувиараа хүүхдүүдээ баярлуулдаг юм байгаа биз хэмээн арга хэмжээг тас хорьжээ. Ийнхүү нийслэлийн хамгийн тэргүүний гэгддэг 23 сургуулийн нэгдүгээр ангийнхан цагаан толгойн баяраа тэмдэглэхээргүй болсонд эцэг эхчүүдийн дунд нилээд маргаан өрнөсөн байна.

 Цагаан толгойн баяртаа бэлдэж байсан хүүхдүүд ч уйлаан майлаан болж. Яамныхаа шийдвэрийг нугалаа завхрал болгож, эцэг эхчүүд болоод хүүхдүүдийг чадах гэсэн сургуулийн захиралын энэ ойлгомжгүй шийдвэр сайн зүйлд хүргэхгүй бололтой. Хүүхдүүдээ үсэглэлийн баярт баахан бэлдүүлсэн эцэг эхчүүд захирлын шийдвэрийн талаар салбарын сайдад нь хандаж дахин гомдол гаргахаар болсон гэж эх сурвалж мэдээллээ.