Махны үнэ өдөртөө өсч, шөнөдөө буурдаг
  “Шонхор" захад хонины цул мах килограмм нь 8000-8500 төгрөг, ястай нь 7800-8000 төгрөгийн үнэтэй байна. Харин үхрийн цул мах килограмм нь 9000-9500 төгрөг, ястай нь 8500-8800 төгрөг бол ямааны цул мах килограмм нь 6000-6300 төгрөг, ястай нь 5800- 6000 төгрөгийн үнэтэй байгаа аж. Тэгвэл адууны мах 5500-6500 төгрөг гэсэн ханштай байна. Энэ нь хоёр долоо хоногийн өмнөх үнэтэй харьцуулахад 300-800 төгрөгөөр нэмэгджээ. Гэхдээ махны жижиглэнгийн наймаачдын хувьд үдээс өмнө, үдээс хойш гэсэн хоёр үнэ хэлж байгаа бөгөөд орой махны үнэ 500-1000 төгрөгөөр унадаг аж.  Махны үнэ өмнөх сараас өсөх болсон гол шалтгаан нь махны нийлүүлэлттэй холбоотой гэнэ.

Гурил 100-150 төгрөгөөр нэмэгджээ
 “Алтан тариа”, “Улаанбаатар”, “Атар” зэрэг дотоодын үйлдвэрийн дээд гурил кг нь 800-850 төгрөг, нэгдүгээр гурил 650-750 төгрөг,  хоёрдугаар гурил 500-560 төгрөгийн үнэтэй байна. Харин “Цесна”, “Мука” зэрэг Орос үйлдвэрийн гурил кг нь 1000-1200 төгрөгийн үнэтэй. Гурилын үнэ харьцангуй тогтвортой байгаа ч жижиглэнгээр савласан гурилын үнэ 100-150 төгрөгийн нэмэгдэлтэй байна.

Хүнсний ногооны үнэ буурчээ
Өнгөрсөн долоо хоногийн сүүлчээр хүнсний ногооны гол нэр болох монгол төмс килограмм нь 800-1000 төгрөг, голланд төмс килограмм нь 1200 төгрөг, Ховдын шар төмс килограмм нь 800-900 төгрөгийн үнэтэй байсан. Мөн монгол үрийн лууван кг нь 1000-1200, сонгино кг нь 1500, чинжүү кг нь 2500-3000, өргөст хэмх кг нь 3000 төгрөгийн үнэтэй байсан юм. Тэгвэл ихэнх томоохон худалдааны төвүүдэд дээрх үнэ тус бүр 200-350 төгрөгөөр буураад байгаа аж. Ялангуяа “Барс” худалдааны төвд бүх үрийн төмс кг нь 450-500 төгрөг, лууван 800 төгрөг, байцаа 800-1200 төгрөг бол сонгино кг нь 800-1100 төгрөг, амтат чинжүү кг нь 2200-2500 төгрөг, өргөст хэмх кг нь 2200-2800 төгрөгийн хооронд хэлбэлзэж байгааг Статистикийн хорооноос мэдээллээ.