Монгол улсын хууль, тогтоомжийн дагуу автомашин эзэмшигч аж ахуйн нэгж, иргэн автотээврийн хэрэгслийн албан татвараа жилд нэг удаа 6 дугаар сарын 1-ний дотор төлөх үүрэг хүлээсэн бөгөөд Агаарын бохирдлын тухай хуулиар төлбөр төлөгч нь Авто тээврийн болон өөрөө явагч хэрэгсэлд ногдох жилийн төлбөрийг жилд нэг удаа тухайн жилийн 6 дугаар сарын 1-ний өдрөөс өмнө харъяалах татварын албандаа төлөхөөр зохицуулагдсан байдаг. Тиймээс нийслэлийн Засаг даргын захирамжаар автотээрийн хэрэгслийн албан татвар, агаарын бохирдлын төлбөр хураах ажил 2013 оны 3 дугаар сарын 1-ээс эхэлсэн юм. Албан татвар, төлбөр хураах ажлыг дүүргүүдийн салбар комисс, хороодын ажлын хэсэг, хороодод ажиллах явуулын хэсэг, банкны салбарууд хамтран зохион байгуулж, хяналтын үзлэг, шалгалтыг Замын цагдаагийн газар, Нийслэлийн татварын газар, Улаанбаатар банк хамтран явуулж байгаа юм.

Мөн төрийн үйлчилгээг иргэдэд хурдан, шуурхай хүргэх зарчмын дагуу албан татвар, төлбөр хураах нэг цэгийн үйлчилгээг нийслэлийн дүүрэг бүрт ажиллуулж эхлээд байгаа юм. Одоогийн байдлаар нийслэлийн төвийн 6 дүүрэгт 23 цэгт татвар ,төлбөр хураах нэг цэгийн үйлчилгээг нээсэн бөгөөд Багахангай, Багануур, Налайх дүүргүүдийн татвар хураах хэлтэст нэг цэгийн үйлчилгээг байгуулан ажиллаж байна. Автотээврийн болон өөрөө явагч хэрэгслийн албан татвар, агаарын бохирдлын төлбөр хураах ажил 5 сарын 31-нээр дуусгавар болох учраас иргэд, аж ахуйн нэгжүүдийг хугацаанд нь татвараа төлөх боломжоор хангах үүднээс татварийн нэг цэгийн үйлчилгээ болон тээврийн хэрэгслийн оношлогооны төвүүд  ажлын өдрүүдэд уртасгасан цагаар ажиллаж байгаа бөгөөд амралтын өдрүүдэд мөн ажиллахаар боллоо. Тиймээс иргэд Та бүхнийг автотээврийн хэрэгслийн албан татвар, агаарын бохирдлын төлбөрөө хуулийн хугацаанд нь төлж иргэний үүргээ биелүүлэхийг “Татвар хураалтын төв комисс”-оос уриалж байна гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.