Монгол Улсын Засгийн газрын “Гол нэрийн бараа, бүтээгдэхүүний үнийг тогтворжуулах” дунд хугацааны хөтөлбөрийн хүрээнд Монгол банк, ҮХААЯ болон гурил үйлдвэрлэгч аж ахуйн нэгжүүдийн хооронд байгуулсан “Гурилын үнийг тогтворжуулах гэрээ”-ний хэрэгжилтийн байдалд ШӨХТГ-аас хяналт тавьж ажиллаж байгаа.
 Энэ ажлын хүрээнд Улаанбаатар хотын Хархорин захад үйл ажиллагаагаа явуулж буй гурил үйлдвэрлэгч болон тэдний бүтээгдэхүүнийг зах зээлд борлуулж буй аж ахуй эрхлэгчид гэрээнд заасан үнээр бүтээгдэхүүнээ нийлүүлж байгаа эсэхэд хяналт шалгалтын ажлыг хийсэн байна.
    Хяналт шалгалтаар “Хангай миллс” ХХК-ийн Хурх нэрийн нэгдүгээр зэрэглэлийн гурилыг жижиглэнгээр 1 кг-ийг нь 750 төгрөгөөр худалдаалж байсан зөрчил илрэв. Энэ нь уг компанийн зүгээс тус гэрээний 4.2–т “Стандартын шаардлага хангасан гурил үйлдвэрлэж зах зээлд 1 дүгээр зэргийн гурилын бөөний үнийг 550 төгрөг, жижиглэнгийн үнийг 650 төгрөгөөс дээшгүй үнээр эцсийн хэрэглэгчдэд борлуулах нөхцлийг бүрдүүлж ажиллана”, 4.3-т “Гэрээт борлуулагч нартайгаа жижиглэнгийн үнийг 650 төгрөгөөс дээшгүй үнээр борлуулах талаар гэрээ байгуулан хэрэгжилтэд хяналт тавина” гэсэн заалтуудыг зөрчсөн болох нь тогтоогдлоо. Иймд “Хангай миллс” ХХК-д   энэхүү зөрчлөө арилгаж, нэгдүгээр зэрэглэлийн гурилыг жижиглэнгээр худалдаалах үнээ буулгахыг үүрэг болгосон байна.