УИХ-ын гишүүн О.Баасанхүүтэй ярилцлаа.

-Та шинэчлэлийн Засгийн газрын Ерөнхий сайдтай хоёр хоног хамт явлаа. Сөрөг хүчний хувьд, УИХ, Засгийн газрын үйл ажиллагаанд нэлээд шүүмжлэлтэй ханддаг хүний нэг нь. Яг хамт яваад ажиглаж байхад өөрт тань юу бодогдож байх юм?

- Бүх зүйлд бодитой үр дүн хэрэгтэй. Бид хангалттай ярилаа. Нэг сайн ярьдаг Ерөнхийлөгчтэй. 20 жил сайхан ярилаа. Одоо ч ярьж байна. Хойшдоо ч хэдэн жил ярих юм шиг байна. Ингэж их ярьчихаад газар дээрээ үр дүн ямар байна гэдгийг харахын тулд Ерөнхий сайдтай хоёр хоног явж байна. Ард түмэн юу хүсч байна, эрх баригчдын сайхан амлалт яг хөрс шороон дээрээ аль хэр наалдацтай бууж байна гэдгийг харах гэж Н.Алтанхуяг гэдэг хүнтэй хамт явж байна.

-Таны хүссэн үр дүн харагдаж байна уу. Одоо бидний танилцаж байгаа Булган аймгийн Хишиг- Өндөр сумын Номгон багийн хувьд гурилын үйлдвэр нээж энэ алслагдсан нутагт шинэ бүтээн байгуулалт хийсэн нь нүдэн дээр харагдаж л байна л даа?

Энд Засгийн газрын оролцоо байхгүй. Энэ хүмүүс шинийг сэтгээд, зоригтой сайхан ажиллаж байна. Тодорхой амжилтад ч хүрсэн байна. Та сая сонссон байх. Хийсэн гурилаа борлуулах зах зээл, тээврийн хүндрэл байдаг юм байна. Харин төр энд ямар туслалцаа, дэмжлэг үзүүлж болох вэ гэдгийг шийдэх ёстой. Хишиг-Өндөр сумын хувьд  улсын хил дээр байрладаг алслагдсан сум. Ямар дэмжлэг, туслалцаа байж болох вэ гэдгийг УИХ дээр тодорхой ярихаар төлөвлөөд байгаа.

-Булганы Хишиг-Өндөр сумын Уньт багаас Хөвсгөл аймгийн Тариалан сумын чиглэлд баригдах 88 км-ын замын ажилтай танилцлаа. Замын ажил гайгүй явагдаж байгаа юм биш үү?

"Кувейтийн Сан"-ийн зээлийн хөрөнгөөр баригдаж байгаа энэ замын ажил бол чухал ач холбогдолтой. Захиалагчийн хувьд Зам Тээврийн яам гайгүй хяналт хийж байгаа юм байна гэж ойлголоо. Гүйцэтгэгчээр ажиллаж байгаа Солонгосын "Ваек Sеок Конструкшн" гэдэг компани нь цэргийн хүмүүс ихэвчлэн байдаг юм болов уу гэж санагдлаа. Би урьд нь өмгөөлөгч байсны хувьд замын маргаан, ер нь замын ажлыг гайгүй сайн мэднэ. Энэ замын тухайд бэлтгэл ажил дутуу л байна гэж харагдаж байна. Санхүүжилтээ бүрэн аваагүй юм байна. Арваннэгдүгээр сард дуусна гэсэн итгэл миний л хувьд төрсөнгүй. Сайхан амлалт өгч болно. Харин ажил хэрэг болгоно  гэдэг нь өөр ойлголт шүү дээ. Хамгийн гол нь бидэнд үр дүн л хэрэгтэй байна. Сая Ерөнхий сайд "Баасанхүү гишүүн ээ та шүүмжлээд л явах юм" гэж байна. Миний шүүмжлэл харин ч багадаж байна гэж бодож байгаа. 20 жил гоё ярьцгаалаа. Одоо жаахан ажил хийе л дээ.

-51 хувийг нь "Кувейтийн Сан" санхүүжүүлсэн энэ 88 км замын санхүүжилт яагаад одоо болтол бүрэн хийгдээгүй байгаа юм бол?

Хариуцлага, санхүүгийн хяналт л сул байгаагийн тодорхой үзүүлэлт гэж бодож байна. Дээр нь замын бэлтгэл ажил хангалтгүй байна гэж дүгнэж байна. Одоо та биднийг дагаад давхиж байгаа 20 гаруй жийпэнд суугаа дарга нар юу хийж, улсаас цалин авч байна. Төрийн ажилтны хүлээх хариуцлага, ёс зүйтэй хатуухан ярилцах хэрэгтэй гэдэг нь энд харагдаж байна.

-Төсөв, санхүүгийн чиглэл өгдөг хамгийн том байгууллагын хувьд УИХ энд хариуцлага хүлээх ёстой бус уу?

-УИХ-ын гишүүд иймэрхүү томоохон бүтээн байгуулалтын ажил дээр биечлэн очоод танилцах хэрэгтэй байна. Гол гол төслүүдтэй заавал газар дээр нь очиж танилцах ёстой юм байна. Улсын төсөв мөнгөнд УИХ-ын гишүүд ихээхэн анхааралтай хандаж, хяналт шалгалт хийж баймаар байна. Саяхан Татварын Ерөнхий газрын нэг хэлтсийн дарга нөхөр л гэртээ арван хэдэн тэрбумаар нь бидний татварын мөнгийг хулгайлаад нуучихсан нь илэрлээ шүү дээ. Ингэхээр хаа хаана аа хяналт шалгалтыг сайжруулах хэрэгтэй байна. Энэ талаар хуулийн төсөл санаачилна.

-Таныг Хууль зүйн сайд Х.Тэмүүжингээс эхлээд гоочлох хүмүүс мунддаггүй. Тойроггүй гишүүн, «шинэков» гээд л?

Тойрогтой гишүүн нь тэгээд хэн байгаа юм. УИХ- ын дарга, Х.Тэмүүжин сайд өөрөө ч тойроггүй шүү дээ. Өнөөдөр хамт явж байгаа Н.Алтанхуяг сайд ч тойроггүй. МАН-ын Ө.Энхтүвшин дарга ч тойроггүй гээд бүгдээрээ маниасаа илүү гараад байх юм байхгүй шүү дээ. Тэртэй тэргүй ард түмэн, сонгогчид харж байгаа. Хэн нь хэн бэ гэдгийг. Тойрогтой, тойроггүй гэж ярьж байхаасаа илүүтэй ард түмний өмнө тулгамдаад байгаа ямар асуудлыг шийдэв, шийдэх гэж явж байна гэдгийг л харах хэрэгтэй.

-Та сая Сэтгүүлчдийн эрх чөлөөний өдрийг марталгүй санаж, урам зориг бадраасан богинохон ч гэсэн сайхан үг хэллээ. Ер нь энд яваа сэтгүүлчид танд ам сайтай байна шүү?

За баярлалаа. Ардчилсан нийгмийн хамгийн гол давуу тал нь үзэл бодлоо чөлөөтэй илэрхийлэх, хэвлэн нийтлэх эрх чөлөө юм шүү дээ. Би хуульч, өмгөөлөгч хүний хувьд сэтгүүлчидтэй аль болохоор ойр байхыг боддог. Хамгийн хүнд хүчир ажлын нэгэнд сэтгүүлчийн ажил багтдаг юм байна лээ. Тийм болохоор та бүхнийг би хүндэлж, аль болохоор ажилд нь тус нэмэр болохыг бодож явдаг юм даа. Хоёр хоног сайхан хамт явлаа. Та ч, би ч ялгаагүй тус тусынхаа ажилд чин сэтгэл гаргаж үнэнчээр зүтгэх л хэрэгтэй юм даа. Би ингэж л боддог хүн.