Энэ зун нийслэлд хийгдэх зам засварын ажлын талаар өнөөдөр Нийслэлийн Засаг даргын тамгын газраас мэдээлэл хийлээ. Хэвлэлийн хуралд нийслэлийн Авто замын газрын удирдлагууд болон инженерүүд оролцож, зам засвар, шинэчлэлтийн ажлын хугацаа, төсөв, чанар зэргийн талаар танилцуулга хийсэн юм. Нийслэлийн хэмжээнд өнөөдрийн байдлаар 18 байршлын 33 газарт автозамын ажил хийгдэж байгаа аж.

Цаашлаад шинээр нэмэгдэх ажлуудтай нийлэн нийт 60 гаруй цэгт ачаалалтай ажиллах төлөвлөгөөтэй байгаа талаар Нийслэлийн Автозамын газрын дарга Д.Нанзаддорж мэдээллээ.
Тэрээр ярихдаа "Жил бүрийн хавраас эхлэн хүмүүсийн уур бухимдлыг хүргэдэг нэг асуудал яах аргагүй зам засварын ажил байдаг. Замын хөдөлгөөний ачаалал нэмэгддэг энэ үед аль болох иргэдийн бухимдлыг багасгах нэг арга нь автомашины дугаарыг тэгш сондгойгоор хязгаарлах" гэсэн юм. Зам засварын оргил үеэр уг арга хэмжээг авах нь зүйтэй хэмээн тэрээр мөн ярьсан юм.

Нийслэлийн удирдлагын зүгээс энэ асуудлаар судалгаа хийж буй бөгөөд одоогийн байдлаар ямар нэг шийдэлд хүрээгүй байгаа аж.

Нийслэлийн Автозамын газрын дарга Д.Нанзаддорж хэлэхдээ "Автозам засварын ажлыг хугацаандаа чанартай хийж гүйцэтгэхэд хамгийн чухал зүйл нь хөдөлгөөний ачааллыг зөв зохион байгуулалтанд оруулах юм. Энэ жилийн хувьд харьцангуй ачаалал ихтэйгээр ажиллах учир ажил гүйцэтгэл болоод иргэдийн бухимдлыг багасгах хамгийн зөв шийдэл нь дугаарын хязгаарлалт гэж үзэж байна. Тиймээс ард иргэдийн зүгээс ч энэ тал дээр нааштай хандахыг хүсч байна" гэсэн юм.