Барилгын салбарт тэр дундаа шинэ орон сууц, үл хөдлөх хөрөнгийн чиглэлээр үйл ажиллагаа явуулдаг байгууллагуудын зохион байгуулж буй "Шинэ орон сууц, үл хөдлөх хөрөнгийн үзэсгэлэн" өнөөдөр "Мишээл Экспо" төвд нээлтээ хийлээ. Үзэсгэлэн тавдугаар сарын 13-ны өдөр хүртэл гарах бөгөөд барилгын ажил идэвхжиж, орон сууцны эрэлт ихсэж байгаа цаг үед зохиогдож байгаагаараа онцлог юм.

Үзэсгэлэнд Эд хөрөнгийн эрхийн бүртгэлийн газар, Гэр хорооллын хөгжлийн газар зэрэг төрийн байгууллагууд, Амины орон сууц, Шинэ орон сууц, Гадна тохижилтын, ҮХХ зуучлалын 120 гаруй компани,  арилжааны банкууд, мөн ОХУ-аас Газобетон, ЗАО Томскабел зэрэг компаниуд оролцож үйл ажиллагаагаа танилцуулж байгаа билээ.
   Нээлтийн арга хэмжээнд БХБЯ-ны Төрийн захиргаа удирдлагын газрын дарга Ц.Доржпалам, БХБЯ-ны ахлах мэргэжилтэн Алтанцэцэг, ОССК-ын Стратеги төлөвлөлт бизнесийн хөгжлийн газрын дарга Д.Энхбаатар зэрэг төрийн байгууллагын удирдах ажилтнууд ирсэн юм.

 “Шинэ орон сууц, ҮХХ-ийн үзэсгэлэн” нь барилгын салбарыг дэмжин төрөөс олгож байгаа орон сууцны нийлүүлэлтийг дэмжих зээл, моргейжийн зээл, барилгын материал үйлдвэрлэгч болон импорлогчдын эргэлтийн хөрөнгийн зээлийн талаар бодит мэдээллийг өгч, орон сууцны хөнгөлөлттэй зээлд хамрагдах хүсэлтэй иргэд эртнээс байраа үзэж сонгох боломжийг олгож байгаагаараа онцлогтой.

     Үзэсгэлэнгийн хүрээнд “Барилгын хөрөнгө оруулагчдын уулзалт”, оролцогч байгууллагуудын бизнес уулзалт, орон сууцны хөнгөлөлттэй зээл, лизингийн үйлчилгээ зэрэг олон сонирхолтой арга хэмжээ зохиогдох юм.