УДЭТ-ын найруулагч, УГЗ Б.Баатарын хөлний бэртэл хүндэрч, яаралтай гадаадад эмчлүүлэх шаардлагатай болсон тул театрын хамт олны зүгээс эмчилгээний зардалд нь нэмэр болохоор хандивын тоглолт зохион байгуулахаар болжээ.

Түүнд зориулсан хандивын тоглолт "УБ Палас"-ын концертын их танхимд бололх юм. Найруулагч Б.Баатар нь 1977-1979 онд Теле  кино үйлдвэрт туслах найруулагч, Монголын радиод найруулагч, уран сайхны удирдагч, программын зөвлөлийн дарга, 1999 оноос одоог хүртэл УДЭТ-т найруулагчаар ажиллж байна.  1985 онд найруулагч Б.Мөнхдоржтай хамтран “Гургалдайн дуут шөнө” жүжиг, найруулагч Г.Доржсамбуутай хамтран “Гарваа” жүжгийг тайзнаа амилуулжээ. Мөн бие даан “Хүн бүгд би” жүжгээ толилуулж байсан юм. “Харанхуйд харагдахгүй”, “Далан худалч”, “Кармен хүүхэн”, “Ганцхан алхахад уулзана”, “Садар эрийг номхотгосон нь”, “Цахлай”, “Хүйтэн сэнтий”, “Гавал сар”, “Амьгүй албат”, “ Ээжээ”, “Атга нөж”, “Мануухай”, “Эхнэрээ зээлээч”, “Ану хатан” зэрэг 20 гаруй уран бүтээлийг тайзнаа амилуулж, театрын урын санг баяжуулсан гавьяатай уран бүтээлч билээ.

Түүний уран бүтээлүүд нь дэлхийн сонгодог бүтээлүүдийг Монголын ард түмэнд сурталчлах, Монголын түүх уламжлалыг хойч үедээ хүргэх, театрын уран бүтээлээр өнөөгийн нийгмийн амьдралын олон асуудлыг уран сайхны аргаар илэрхийлэх, хүүхэд залуучуудад эх оронч үзэл төлөвшүүлэх, гоо сайхны мэдрэмж бий болгох, шинэ залуу уран бүтээлчдийг төлөвшүүлэн хөгжүүлэхэд ихээхэн үүрэг гүйцэтгэсэн хэмээн урлаг судлаачид өндрөөр үнэлдэг.