Улсын дээд шүүхийн судалгааны төвөөс эцэг ,эх байх эрхийг нь хассан иргэдийн тоо хэд хүрч байгаа талаар судалгаа гаргажээ. Тодруулбал, хуулийн дагуу эцэг эх байх эрхийг нь хассан тохиолдол сүүлийн зургаан жилд 48 удаа гарчээ.  Түүнчлэн шүүхээс хуулийн дагуу эцэг тогтоосон тохиолдол сүүлийн зургаан жилийн байдлаар 2100 байгаа юм байна. Мөн Улсын Дээд шүүхийн Судалгааны төвөөс гаргасан судалгаагаар сүүлийн хоёр жилд шүүхээр шийдвэрлэгдсэн гэр бүлийн маргаан буурчээ. Тодруулбал, шүүхээр шийдвэрлэгдэж байгаа гэр бүлийн маргаан 2007-2010 онд байнга өссөн бол 2011, 2012 онд буурсан үзүүлэлттэй байгаа аж.

Ямартаа ч хуулийн дагуу эцэг эх байх эрхийг нь хассан тохиолдол  2007 онд 3, 2008 онд 12, 2009 онд 16, 2010 онд 6, 2011 онд 7, 2012 онд 4 удаа ийм тохиолдол гарсан байна. Энэ хугацаанд нийслэлд 17 хүн эцэг, эх байх эрхээ хасуулсан бол Дорнодод 9, Дархан-Уулд 5, Ховдод 4,  Өвөрхангайд 3, Сэлэнгэд 2, Архангай, Булган, Орхон, Өмнөговь, Говьсүмбэр, Дорноговь, Хэнтий, Дундговь аймгуудад тус бүр 1 хүн эцэг эх байх эрхээ хасуулжээ.