МИАТ ХК шинэ “Боинг 767-300ER” онгоцоо энэ сарын 15-нд Монголынхоо үйлчлүүлэгчдэд танилцуулах гэж байгаа билээ. Тэгвэл өчигдөр Зам тээврийн яамны төрийн нарийн бичгийн даргаар ахлуулсан хүмүүс шөнийн 01.00 цагийн үед АНУ-д шинэ онгоцоо хүлээж авсан байна. Мөн МИАТ-ын инженер техникийн ажилтнууд шинэ “Боинг 767-300ER онгоцны техникийн бичиг баримт болон түлхүүрээ хүлээн авчээ. Харин онгоцны Монголд дах албан ёсны  танилцуулга маргааш болно.

МИАТ компани хамгийн сүүлд нислэгийн чадавхи, хүчин чадлыг нэмэгдүүлэх байдлаар Монгол руу чиглэх агаарын замын зорчих хөдөлгөөнийг идэвхижүүлэх, улмаар аялал жуулчлалыг хөгжүүлэх боломжтой гарцуудыг хараад байгаа. Энэ хүрээнд Монгол Улсын Ерөнхийлөгч Ц.Элбэгдорж 2011 онд АНУ-д хийсэн айлчлалын үеэр МИАТ компанид шинэ онгоц худалдан авах тухай гэрээг “Боинг” компанитай байгуулсан.   Гэрээ ёсоор “Боинг” компани Монголын захиалсан “Боинг 767-300 ER” онгоцыг нийлүүлж байгаа нь энэ юм.

 Уг онгоцыг худалдан авах хөрөнгийг бондын хөрөнгөөс гаргаж байгаа юм. МИАТ компани харин бондын хөрөнгөөс авсан мөнгөө эргүүлэн төлөх нөхцөлтэй байгаа. “Боинг 767-300 ER” онгоцыг алсын зайн нислэгт ашиглах юм. Үүнээс гадна Монгол Улс “Боинг 767-800” загварын хоёр онгоцыг 2016 оны нэг ба хоёрдугаар улиралд багтаан авах төлөвлөгөөтэй байгаа юм.