Шударга өрсөлдөөн хэрэглэгчийн төлөө газраас иргэдийн гомдлын дагуу арилжааны 14 банкинд шалгалт хийжээ. Уг шалгалтаар долоон зөрчил илэрсэн байна.   Шалгалтаар илэрсэн нийтлэг зөрчилд аж ахуй нэгж, иргэдэд зээл олгохдоо шимтгэл авдаг явдал аж. Энэ нь өрсөлдөөний тухай хуулийн 12.1, 10-ийг зөрчсөн үйлдэл юм. Мөн зээл авахад бүрдүүлэх материалууд нь хэт ихээс байгаагаас гадна заавал баталгаажуулах шаардлагагүй олон бичиг баримтыг цөөлөх шаардлагатай байгаа талаар О.Магнай дарга шаардлагадаа тусгажээ. Мөн зээл олгоход авч байгаа төлбөр хураамжийг үйлчлүүлэгч өөрөө хариуцдаг нь мөн л өрсөлдөөний тухай хуулийн зөрчсөн хэрэг гэнэ. Арилжааны банкууд гэрээний загварыг урьдчилан баталж, салбар нэгжүүддээ тарааж банкны ажилтнууд тэдгээр гэрээний нөхцөлийг иргэдэд шууд тулгах замаар гэрээ байгуулж байгаа нь хууль зөрчиж буй үйлдэл. Үүнээс гадна иргэд зээл болон хадгаламжийн үйлчилгээ авах үед үйлчлүүлэгчид хүүг хэрхэн тооцдог талаар хангалттай танилцуулга хийдэггүйгээс гадна хүүг жилээр тооцож, сард ногдох хүүг хэрхэн тооцдог талаар бодит мэдээлэл өгдөггүй зэрэг зөрчлүүд илэрчээ.