Хүүхдийн баяр болоход хоёр долоо хоног хүрэхгүй хугацаа үлджээ. Албан байгууллага, айл өрхөөрөө бяцхан үрсээ хэрхэн баярлуулах талаар аль хэдийн ярьж эхэлсэн энэ цагт Хүүхдийн паркийн үнэ тарифын асуудал олны дунд бухимдал үүсгээд байна.  Монголдоо ганц гэгддэг хүүхдийн паркад орж тоглоход нэг хүүхэд 15000 төгрөг, том хүн тоглохгүй байсан ч хамаагүй 20000 төгрөгийн тасалбар авах гэнэ.

    Өмнө нь 1000 төгрөгийн тасалбар авч ордог, нэг тоглоомын үнэ 4000-6000 төгрөгийн үнэтэй байсан бол одоо 20000 төгрөгний тасалбар төлөөд бүх тоглоом дээр үнэгүй тоглоно. Энэ нь бүх тоглоом дээр гэхээр хямдхан юм шиг сонсогдож байгаа. Гэвч нэг өдөр паркад тоглоход 2-3 хүүхэдтэй айл 60 000 төгрөг, дээрээс нь эцэг эх нь 40.000 мянган төгрөг төлж таарах нь. Ингэхлээр дор хаяж 80-100 мянган төгрөгөөр хүүхдээ тоглуулах хэрэг гарч байгаа юм. Ингэхдээ бас учиртай. Хэрвээ тэр айл бага насны хүүхэдтэй бол бүтэн өдөржин парк дотор өнжихгүй боломжгүй юм. Хүүхэд 2-3 цаг тоглоод уйдна, уйлна, өлсөнө, ядарна, унтана тэгээд л паркаас гарна.

 Мөн ганцхан алсыг харагч дээр суух гэж  парк ордог ч хүн байна. Тэр хүн зөвхөн алсыг харагч дээр суухын тулд 20.000 төгрөг төлөх нь бас асуудалтай. Иргэдэд сонголт олгоогүй энэ үйлчилгээ мөнгөтэй, баян хүмүүст нэг их хамааралгүй ч нийгмийн олонхи болсон дунд болон ядуу амьдралтай айлын хүүхдүүдэд хүндээр тусч байна. Өмнө нь сарын 300 мянган төгрөгийн цалинтай айл хүүхдүүдээ 30-40 мянган төгрөгөөр тоглуулдаг байсан бол одоо цалингийнхаа 50 хувийг зөвхөн паркад өгөх нь. Ингэх айл хэр олон байх бол. Энэ тогтолцоо яваандаа “Баян айлын хүүхдүүд паркад тоглодог” гэсэн сэтгэлгээг нийгэмд бий болгох вий дээ. Эцэг, эхчүүдийн хүүхдүүдээ зугаацуулахаар зорьдог ганц газар болох паркийн тоглоомын үнэ тэнгэрт хадчихаар нөгөө бор амьдралтай хүмүүсийн хүүхдүүдэд Сүхбаатар, Ялалтын талбайн өмнөх машин л үлдэж байна. Үүнээс өөр  сонголтгүй шүү дээ.  Энэ мэт бидэнд паркад тоглох уу, эс тоглох уу гэдэг асуулт л үлдээд байна.


 Үнэхээр Үндэсний соёл амралтын хүрээлэн монополдож өөрсдийн дураар үнэ нэмсэн үү, өрсөлдөөний тухай хуулийг зөрчсөн үү гэдгийг шалгаж байгаа гэдгээ О.Магнай дарга саяхан дуулгасан. О.Магнайг өмнө нь олон ажил цэгцэлсэн шигээ паркийн асуудлыг зургаан сарын 1-ээс өмнө шийдвэрлнэ хэмээн иргэд итгэж байна.