Х.Дэлгэрийн Цолмон охин зургаахан сартайдаа "ТУНГАЛАГ ЭСИЙН ХОРТ ХАВДАР"-аар өвчилж одоо Япон улсад эмчлүүлж байгаа билээ. Япон эмч нарын зүгээс охиныг эрүүл болгох боломжтой гэсэн хариу хэлсэн бөгөөд эмчилгээний зардал гэж маш их мөнгө хэрэгтэй болсон. Эмч нарын гаргасан ерөнхий тооцоогоор охинд 2 жил 3 сар орчим эмчилгээ хийнэ. Энэ хугацааны эмчилгээний нийт зардал 33 сая иен буюу 500 сая төгрөг. 

Цолмон охин одоо Японд эмчилгээгээ амжилттэй үргэлжлүүлж байна. Тэрээр одоо 1 нас 2 сар хүрэх гэж байгаа бөгөөд мөлхөж, түшиж зогсдог болсон байна. Одоогийн байдлаар охины гуравдугаар шатны эмчилгээ нь эхэлчихсэн байна. Эмчилгээ энэ эрчээрээ тасралтгүй сайн үргэлжилбэл охин ойролцоогоор нэг жил таван сарын дараа эмнэлгээс гарч гэрээр эмчилгээ хийлгэх аж.

Цолмон охинд туслах хандивын аян одоог хүртэл үргэлжилж байна. Энэ сарын 4,5-ны өдрүүдэд Япон дах Монгол оюутнуудын холбооноос уламжлал болгон зохиодог "Хаврын баяр" 13 дах жилдээ болсон байна. Тус баярт монголын сүмочид хүрэлцэн ирж, Их аварга Хакүхо Даваажаргал, Оозэки Какүрюү Ананд нар охины хандивын аяныг дэмжин, хүмүүсийг уриалж, хандив өргөсөн хүмүүстэй хамт зургаа авахуулсан байна. Их аваргыг уриалсны ачаар хандивын аян амжилттай үргэлжлэн, эмчилгээний төлбөрт нилээн нэмэр болохоор мөнгө цуглуулж чаджээ.  Иймд тус наадмыг зохион байгуулан, оролцох боломжийг олгосон Япон дахь Монгол Оюутны холбооны хамт олон, Их аварга Даваажаргал, Ананд болон бусад сүмоч, хандив өргөсөн сайхан сэтгэлт нийт хүмүүст, мөн хамгийн хүнд ачааг үүрэн хандивын аянд туслалцсан найзууддаа Д.Цолмон охин аав, ээж манай сайтаар дамжуулан талархал илэрхийллээ.