Холливудын халуухан залуусын нэг тун сонирхолтой ярилцлага өгчээ. “Step Up 2” киногоороо ямар авьяаслаг бүжигчин болохоо, “Dear John”,  “The Vow”-ын дүрээрээ ямар романтик, халуухан залуу болохоо харуулж чадсан Ченнинг Татумын дотоод ертөнцийг энэхүү ярилцлага бага ч атугай илэрхийлжээ.

-Ингэхэд чи хэзээнээс хип хоп бүжиглэж эхэлсэн юм бэ?
-15 настай байхдаа л гэж бодож байна. Миний эгчийн найзууд нь шөнийн клубын менежер байсан юм. Бас түүний найз залуу график дизайн хийдэг байсан. Би нэг зүйлийг огт мартдаггүй юм. Тэд намайг шөнийн клуб рүү дагуулж ороод гайхалтай бүжиглэж байгаа залуусыг харуулсан. Тэнд залуус толгой дээрээ эргэж байхыг хараад би “Бурхан минь гэж. Би ч гэсэн үүнийг хийхийг хүсч байна” гэж бодож байсан.

-Чи толгой дээрээ эргэж чаддаг болсон уу?
-Би хоёр, гурван удаа л эргэж чадна. Гэхдээ би тийм ч сайн биш. Би үүнийг жинхэнэ брек бүжигчид шиг хийж чаддаггүй.

-Харин олны танил болох гараагаа хэрхэн эхлүүлсэн юм бэ?
-Нэг удаа би “Би амьдралдаа ямар нэгэн зүйл хийж үзэх хэрэгтэй” гэж шийдсэн. Тэгээд л би Миамиг зорьсон. Харин намайг гудамжинд явж байхад нэг хүн намайг модель болохыг санал болгосон.

-Тэгэхээр Миамигийн гудмаар алхаж байсан залууг хэн нэгэн хараад “Би түүнийг модель болгоно” гэж шийдсэн байх нь ээ?
-Бараг л.

-Би ч бас гудмаар алхдаг. Гэхдээ надад хэзээ ч ийм зүйл тохиолдож байгаагүй шүү. Чи хэний модель болсон юм бэ?
-Abercrombie бас Fitch.

-Дараа нь юу хийсэн бэ?
-Би хэд хэдэн кампанит ажилд оролцсон. Моделийн ажил маань нэлээд амжилттай байсан. Надад ч үнэхээр таалагдаж байсан. Би бүх ертөнцийг харж байсан. Тэгээд “Пепси”-гийн сурталчилгаанд тоглосон юм. Энэ үнэхээр хөгжилтэй, онцгой санагдаж байсан. Тиймээс би жүжиглэж үзэх хэрэгтэй ч байж мэднэ гэж бодох болсон. Би action кинонд үнэхээр дуртай. Би оюун ухааны ажиллагаанаас илүү биеийн хүчний зүйлийг илүү сайн хийдэг юм шиг санагддаг. Ер нь би гүйж харайх их дуртай.

-Тэгээд л чамд сайхан бие махбодь заяасан байх... Нээрэн чи хувцасыг нь өмсөөгүй ч “Хүн аалз” шиг байдаг шүү. Нэг удаа чи кино зураг авалтын ажлын үеэр миний цонхоор авирч байсан. Тэгэхэд би юу гэж бодож байсан гээч?
-Юу гэж бодсон бэ?

-“Энэ залуу хагас сармагчин юм байна” гэж. Чи киноны үеэр бэртэж, гэмтэж байсан уу?
-“Fighting” киног хийж байхад яг зураг авалтын дундуур би хамраа гэмтээж байсан. Ухаан балартаад л явчихсан шүү.

-Би чиний олон action киног үзнэ гэж боддог. Гэхдээ би чамайг инээдмийн кинон дээрээс харахдаа ч дуртай байна аа?
-Би инээдмийн жүжигчин биш. Чадах зүйлдээ л тоглоно. Хүмүүс миний киног үзээд “Энэ залуу драмын кинондоо л тоглосон нь дээр байж дээ....” гэж хэлээсэй гэж хүсэхгүй байна. Тиймээс инээдмийн кино миний сонголт биш байх аа.
 
-Айдаг зүйл чинь юу вэ?
-Инээдмийн кино.

-Чиний карьерт нөлөөлж, урам зориг өгдөг жүжигчин байгаа юу?
-Залуу минь маш олон жүжигчид байгаа. Гэхдээ би хэн нэгнийг дагаж, дуурайхыг хүсдэггүй. Брэд Питт гэхэд хүн бүхэнд олон кино дүрээрээ танигдсан жүжигчин. Гэхдээ тэр бол Брэд Питт. Харин Ченнинг Татум бол Ченнинг Татум шүү дээ.

-Чиний хамгийн дуртай газар?
-Алабама дахь манай гэр бүлийн ферм.
-Яагаад?
-Яагаад гэвэл тэнд нэг ч муу дурсамж байдаггүй. Бид саравчин доороо аав, ээж, ах эгч, авга, ах эгч гээд бүгдээрээ суугаад бүх зүйлийг хамтдаа хийж, ярилцдаг. Хайртай бүх хүмүүстэйгээ хамт байдаг юм.

-Чиний бодлоор диваажин ямар байдаг бол?
Маш том... мянга, мянган акр газрыг эзэлсэн. Тэнд нь миний гэр бүл, бүх найзууд минь хамт амьдардаг тийм л газар.

-Харин там гэвэл?
-Там, магадгүй... Хөгжилтэй зүйл санаанд орж байна. Гэхдээ одоо би үүнийг хэлэхгүй ээ.
-Амьдралдаа баримталдаг зарчим чинь юу вэ?
-Сайн найзууд, сайхан ирээдүй.