Саяхан Олон улсын Баавгайн нийгэмлэг, Биологийн хүрээлэн, Говийн их дархан цаазат газрын А хэсгийн хамгаалалтын захиргаатай хамтран Сэгс цагаан богд уулын районы Мухар задгайн цэгээс урьд өмнө баригдаж байгаагүй 160 кг жинтэй нэг эр баавгайг барьж сансрын болон радио дохиололтой хүзүүвч зүүсэн байна.Уг баавгай нь анх удаа баригдаж байгаа юм. Унтуулсны дараа баавгайгаа хэмжиж, дээж авчээ. Насыг нь шүдний элэгдлээр тооцон найм гэж таамагласан байна. Бүх хэмжилтээ хийж цус болон арьс, үсний дээж авсан гэнэ. Уг баавгай хачиг болон бусад шимэгчгүй байжээ. Баавгайг сэрэхээс нь өмнө задгай сүүдэр газар тавьж алсаас ажиглалт хийж байхад цаг гаруй хугацааны дараа аажмаар толгойгоо хөдөлгөж эхэлсэн бөгөөд улмаар хөлөө хөдөлгөж байжээ. Мазаалай тарилганы үйлчилгээ гарсны дараа ихэд уурлаж байгаа бололтой ойр хавийн мод, автомат камер зэрэг эд зүйлсийг хазах зэрэг үйлдэл гаргаж байгаад 20 минутын дараа тайвшран зэгсэнд дундуур явсан байна.
Мазаалайд дохиолол тавих ажлыг 2005 оноос хийж байгаа бөгөөд нийтдээ 15 мазаалайд дохиолол тавьжээ. Одоогоор хоорондоо тусгаарлагдмал байдалтай Цагаан богд, Шар хулсын нуруу, Атас, Ингэсийн уулс гэсэн 3 хэсэг газарт 22-31 орчим мазаалай байгааг генетикийн судалгаагаар тогтоожээ.
Сэтгэгдэл (8)