Дэлхий дахинд нэг хүнд ноогдох архины хэрэглээ наймаас есөн литрт хүрэхэд үндэсний аюулгүй байдлын хүрээнд авч үздэг бол Монголд энэ тоо таваас зургаа дахин их буюу 42 литр аж. Ийнхүү архины хэрэглээ нэмэгдэхийн хэрээр хүн амын дунд архинаас үүдэлтэй суурь өвчлөл, нас баралт, гэмт хэрэг жилээс жилд өсөх хандлагатай байгаа юм. Таван гэмт хэрэг тутмын нэгээс хоёр нь архидан согтуурснаас үүдэлтэй байдаг гэнэ. Тиймээс архины хор хөнөөлийг таниулсан наалт байршуулахыг согтууруулах ундаа үйлдвэрлэгчид болон импортлогч компаниудад Энхтайван ирээдүй хөгжил төрийн бус байгууллагаас уриаллаа. Тус төрийн бус байгууллага фэйсбүүк хаягаараа дамжуулан 40 мянгаас дээш иргэний дэмжлэгийг авч чадвал энэхүү уриалгаа шаардлага болгоно гэж мэдэгдсэн юм байна.