Монгол Улсын Ерөнхийлөгчийн ээлжит сонгууль өнөөдөр албан ёсоор эхэлж байгаа. Нэр дэвшигч Ц.Элбэгдорж /АН/, Б.Бат-Эрдэнэ /МАН/, Н.Удвал /МАХН/ нар өнөөдөр СЕХ-ноос нэр дэвшигчийн үнэмлэхээ авснаар сонгуулийн кампанит ажил албан ёсоор эхлэж байна. Сонгууль бодитой амжилттай болох нэг гол үндэс нь ирцийн асуудал байдаг. Аливаа сонгуульд залуучуудын оролцох идэвхи тун хангалтгүй, муу байдаг талаар бид байнга яридаг. Тэгвэл МЗХ тун удахгүй болох Монгол Улсын 5 дах удаагийн Ерөнхийлөгчийн сонгуульд хамгийн идэвхигүй оролцдог хэсэг болох 18-35 насны бүхий л залуучуудаа татан оролцуулах, тэдний идэвх оролцоог сайжруулах, сонгууль өгөх ач холбогдолыг тайлбарлан таниулах улмаар сонгуулийн ирцийг нэмэгдүүлэх зорилгоор “Сонгуульдаа оролцъё” сарын аянг хийхээр төлөвлөж байгаа юм байна. 2013 оны бүхий л ажлаа “Оролцъё” уриан доор зохион байгуулан явуулж байгаа МЗХ сонгуульд аливаа нэг нам хүчнийг дэмжихгүй, харин залуучуудыг сонгуульдаа идэвхтэй оролцуулах үүднээс СЕХ-тай хамтран ажиллах хүсэлтээ явуулсан гэнэ. УИХ, Орон нутгийн сонгуульд хамгийн идэвхи муутай оролцсон хvмvvсээр оюутан, залуучууд тодроод байгаа бөгөөд энэхүү асуудал нь залуучууд Үндсэн хуулиар олгогдсон сонгох эрхээ эдэлж чадахгүй байгааг илтгэж байна гэж тэд үзэж байгаа аж.