“Маск”, ”Эйс Вентура”, “Бүхнийг чадагч Брюс”, “Худалч худалч” зэрэг инээдмийн  киногоороо үзэгчдийн сэтгэлд хоногшсон Холливүүдийн алдарт жүжигчин Жим Керригийн сонирхолтой ярилцлагаас уншигч та бүхэндээ хүргэж байна. 

“Маск”, ”Эйс Вентура”, “Бүхнийг чадагч Брюс”, “Худалч худалч” зэрэг инээдмийн  киногоороо үзэгчдийн сэтгэлд хоногшсон Холливүүдийн алдарт жүжигчин Жим Керригийн сонирхолтой ярилцлагаас уншигч та бүхэндээ хүргэж байна.  

- Таныг төрөлхийн инээдмийн жүжигчин гэдэгтэй хүн  бүр  санал  нийлэх байх. Багадаа Жек Николсон, Брежнев зэрэг олон алдартнуудыг дуурайдаг байсан гэдэг.  Бас хожим Николсонтой танилцахад танд юу гэж хэлж байв?
- Намайг залуу байхад хүйтэн дайн ид үе дээрээ байлаа. Зөвлөлт Холбоот улс Америк руу халдах нь гэж үргэлж айлгаж байсан. Үүний зэрэгцээ ЗХУ-ын удирдагч Брежневийг байнга харуулдаг байв. Тэр өөрийн гэсэн ярианы хэв маягтай хүн байсан нь миний анхаарлыг татахгүй байхын аргагүй байсан юм. Харин Николсоны хувьд тэр надад хэзээ ч гомдож байгаагүй. Эсвэл гомдоогүй юм шиг царай гаргаж байсан байх. (инээв).

- Таны бүтээсэн дүрийн олонхи нь инээдмийнх байдаг. Та инээдмийн төрөлд илүү дуртай юм аа даа?
- Мэдээж хүнийг инээлгэж, зовлонг нь түр ч гэсэн мартуулна гэдэг агуу үйл. Хүн инээлгэх дургүй хүн гэж байдаггүй болов уу. Найз нөхөд, гэр бүлтэйгээ байхдаа ч хошигнож, инээд хөөр бэлэглэх дуртай. Харин жүжигчин хүнийхээ хувьд бол инээдмийн төрлөөс илүүтэй уянгын талдаа сонирхолтой шүү. Би уран бүтээлч хүн учраас бүтээлч байхыг хичээдэг. Хамгийн бүтээлч жүжиглэлт инээдмийнхнээс шаарддаг юм. Ганц удаа инээлгэхийн тулд олон зүйл бодож, толины өмнө өч төчнөөн янзаар нүүр амаа мурийлгаж, сарийлгана шүү дээ.

- Таны хувьд тоглосон дүрүүдээс тань аль нь хамгийн үнэ цэнэтэй вэ?
- Нэгдүгээрт, инээдмийн кинонд тоглох нь драмын кинонд тоглохоос амархан гэж эндүүрч болохгүй. Хоёрдугаарт, олон хүн үзэж чадаагүй кинонууд маань ч надад үнэ цэнэтэй. Тухайлбал,“Оскар”-ын шагналт Мартин Ландаутай тоглосон “Мажестик” кино. Кино театрт үзэж амжаагүй ч телевизээр болон видео прокатаар үзсэн тодорхой хэмжээний үзэгчид бидний ажлыг үнэлсэн.

- Та кинонд эрсдэлтэй алхам хийхээс айдаггүй. Таны гол дүрд нь тоглож найруулсан “Эйс Вентура, Тэжээвэр амьтдын эрэлд” кино тэдгээрийн нэг нь. Харин энгийн амьдрал дээр та хэр эрсдэлтэй алхам хийдэг хүн бэ?
- Хэрвээ та кино шүүмжлэгчидтэй уулзвал миний хувьд хамгийн том эрсдэлтэй алхмыг драмын кинонд тоглох гэж хэлэх байх. Магадгүй тэдний зөв. Гэхдээ би төрөл бүрийн кинонд тоглох төлөвлөгөөтэй байна. Харин экстрим спортын хувьд би хөнгөн атлетикийг илүүд үздэг. Гэхдээ зүгээр нэг байшингаа тойроод гүйх биш жинхэнэ марафон гүйлтийг  би хүсч байна.

- Зураг авалтын талбай дээр ямар үзэгдэл танд хүнд хэцүү байдаг вэ?
- Хэрвээ та биеийн өвдөлтийг ярьж байгаа бол би гэмтэл бэртэлд анхаарлаа хандуулахаа бараг л больсон. Би “Маск”, “Эйс Вентура”, “Кабелийн ажилтан” гээд кино зураг авалтын үеэр зөндөө л бэртэж байсан. Харин үргэлж “за” гэж хэлдэг (Yes man) кинонд тоглож байхдаа би гурван  ч хавиргаа хугалсан. Гэхдээ сэтгэлийн шархыг даван туулах нь илүү хэцүү. Таны ажлыг хүмүүс үнэлэхээс татгалзана гэдэг ямар хүнд гээч. Ер нь Холливүүдэд  инээдмийн жүжигчдэд тун хачин ханддаг. Та инээдмийн эрэгтэй жүжигчинд  “Оскар”-ын гол дүрийн шилдэг жүжигчний шагнал олгож байсан удааг санаж байна уу? Инээдмийн жүжигчин драмын кинонд тогловол үзэгчид ойлгохгүй өнгөрч болох учраас энэ нь тун  эрсдэлтэй юм. Үзэгчид инээдмийн киноны дуртай жүжигчнээ инээдмийн кинонд л харахыг хүсдэг. Драмын кинонд тоглох нь эрсдэлтэй алхам юм.

- Танд кино ертөнцөд бүтээхийг хүсдэг төрлүүд байдаг байх ?
- Бодох хэрэгтэй... Би инээдмийн, драмын болон аймшгийн кинонд тоглож байсан. “Дугаар 23” кино.  Надад сэтгэл мэдрэлийн өвчтэй алуурчны дүрд тоглох маш хүндрэлтэй байсан. Харин одоо түүхэн эсвэл моодонд ороод байгаа зөгнөлт кинонд тоглох тухай бодож байгааа. Одоогоор  “Барт Уандерстоун” хэмээх шинэ киноны мэргэжлийн илбэчин шидтэний дүрд тоглож байна. Надтай хамт Стив Карелл, Жэймс Гандольфини болон Стив Бушеми зэрэг гайхалтай жүжигчид тоглож байгаа. Харин энэ кино бол миний дуртай инээдмийн төрлийнх!

- Ер нь Жим Керри  бодит амьдрал дээр ямар  хүн бэ?
- Би бусдаас илүү эрч хүчтэй, бүтээлч амьдрахыг хүсдэг. Үргэлж шинэ санаа сэдэж, түүнийгээ биелүүлж, үр дүнг нь харж байж санаа минь амардаг хүн.  Жүжигчин болохоороо олон янзын ааш зантай шүү дээ бид чинь.

- Таныг дэлхийн хамгийн сонирхолтой, хөгжилтэй хүн гэдэг. Үүнтэй санал нийлдэг үү?
- Би хөгжилтэй хүн гэдэгтээ санал нийлнэ. Харин сонирхолтой гэдэг бол харьцангуй ойлголт. Жишээ нь би 2000 хүний дундаас хамгийн сонирхолтой хүн байж болно харин. Дэлхийд хоёрхон мянган хүн амьдардаггүй шүү дээ.

- Ярилцсанд баярлалаа.