Хяналт шалгалтын байгууллагуудаас хамтран хүнс тэр дундаа гаднаас импортоор орж ирдэг цагаан будаанд шалгалт хийжээ. Шалгалтанд цагаан будааг бөөнөөр болон жижиглэнгээр худалдаалдаг “Барс” хүнсний зах, “ТЭСО” ХХК, “Грийн сити” ХХК, “Материал импекс” ХХК, “Бөмбөгөр” худалдааны төв дээр худалдаалагдаж байгаа “Сакура”, “Слава”, “Сайн цагаан будаа”, “Зааны зурагтай цагаан будаа”, “Като” нэрийн цагаан будаанаас нийт 17 дээж авсан байна.Улмаар дээжийг МХЕГ-ын НТЛ, НМХГ-ын итгэмжлэгдсэн лабораториудад шинжлүүлэхэд шинжилгээний дүнгээр дээрх цагаан будаанд гадаад хорио цээртэй шавьж тэдгээрийн өндөг, авгалдай илрээгүй, хүнд металлын үлдэгдэл хар тугалгын агууламж “Хүнсний бүтээгдэхүүн дэх хүнд металлын үлдэгдлийн хэмжээ” MNS 4504:2008 болон ОХУ-ын “Гигиенические требования безопасности и пищевой ценности пищевых продуктов” СанПиН 2.3.2.1078-01 стандартуудад заасан зөвшөөрөгдөх дээд хэмжээнээс хэтрээгүй байна гэсэн дүгнэлт гарчээ. Өмнө нь цагаан будаанаас дээрх зөрчлүүд илэрчээ гэх мэдээлэл хэвлэл мэдээллийн хэрэгслээр цацагдаад байсан билээ.
