Өнгөрсөн долоо хоногт дунд сургуулийн долдугаар ангийн нэгэн охин үеийн охиноо  зэрлэгээр зодож буй бичлэг фэйсбүүк сайтад тавигдаж нэг хэсэг шуугиан тарилаа. Зодоон хийж буй бичлэгийг үзсэн хүмүүсийн ихэнхи нь охидыг эцэг, эхийнх нь хамтаар шүүмжилж, зарим нь харааж байсан бол бусад нь шэйр, лайк хийн цааш нь түгээв.

    Тус бичлэг нь өсч өндийж яваа өсвөр насны охидтой аав, ээжүүдийн сэтгэлийг өвтгөж нэгийг бодогдуулахад хүргэсэн бол бас манай хэвлэлийнхнийг хийх ажилтай болгож орхив. Зарим нэг телевизүүд охидын зодоон хийж буй бичлэгийг бүрэн эхээр үзүүлсэн. Яагаад тэр вэ? Гэмт хэрэгт холбогдсон хүн болон хүүхдийн царайг олон нийтийн мэдээллийн хэрэгслээр ил цагаанаар цацаж байгаарай гэж бидний мэргэжлийн ёс зүйд заагаагүй байлтай.

    Нөгөө хүүхдийн эрх, сэтгүүл зүйн дүрэм, мэргэжлийн ёс зүй хаачсан бэ?. Зодсон ч зодуулсан ч тэд бол насанд хүрээгүй хүүхэд. Хэн хэнд нь мөрөөдөл, сайхан ирээдүй байгаа. Өсвөр насны охидын зодоон сургуулийн орчинд  байнга л болдог. Тэр бүрийн араас бид хөөцөлдөөд сенсаацлаад байдаггүй шүү дээ. Гэтэл эдгээр охидыг залхаан цээрлүүлж, амьдрах итгэлгүй болгож байгаа юм шиг олон нийтийн мэдээллийн хэрэгслээр дахин давтан ярьж, нүүр царайг нь ил гаргаж болно гэж үү.

    Угаас охидыг шалгадаг газар нь шалгаж, зохих ёсны шийтгэлийг нь өгч байгаа. Гэтэл хүүхдийг сургууль, найз нөхдийнх нь дунд нэр хүндгүй болгож цаашлаад улс орон даяар нүүр хийх газаргүй болгож байгаа юм шиг ингэж авирлана гэдэг чинь...

    Үүнээс болж хүүхэд өөртөө итгэх итгэл, амьдрах итгэлээ алдах сөрөг талтай. Бүр манай нэгэн нэр хүндтэй мэдээллийн сайт зодоон хийсэн охидын сургууль дээр очиж багш нартай уулзан мэдээ бэлтгэсэн байсан. Ингэхдээ сэтгүүлч хүүхдүүдийн нэрийг “Тэр ангийн тийм охин” гээд л нэр усыг нь бүтнээр нь дуудсан. Тэр мэдээ хүний мууд дуртай хүмүүсийг хэсэгхэн хугацаанд үзэх зүйлтэй болгосон болохоос  хэнд  ч ач холбогдолгүй байсан гэдгийг энд дурдая.

    Хүүхдийг нэг удаа алдаа хийснийх нь төлөө амьдралд нь том хар толбо үлдээж, өөртөө итгэлгүй хүн болгоход нь хэвлэлийнхэн бид нөлөөлж болохгүй.

    Хэдхэн долоо хоногийн өмнө харгис эцгийнхээ гарт заазуурдуулсан хүүгийн царайг ил гаргасан асуудал ч энд бас хамаатай юм.  Ер нь иймэрхүү тохиолдолд бид боловсролын салбар, хүүхдийн хүмүүжлийн асуудлыг ярих ёстой болохоос хүнийг нь онцлох шаардлаггүй санагдана. Дүрмээрээ олон улсын конвенц, сэтгүүлчийн ёс зүйн дүрэм, мэргэжлийн дүрэмд гэмт хэрэг хийсэн ч бай хүүхдийн царайг үзүүлдэггүй байх ёстой юм.

    Бид хүүхдийн эрхийг хүндэтгэх ёстой. Бусад үед хүүхдийн эрх гэж сүрхий шүүмжилж ярьж, бичдэг хүмүүс маань энэ удаа хүүхдийн эрхийг хөсөр хаялаа . Нөгөө талаар олон нийтийн мэдээллийн хэрэгсэл бол интернэтэд тавигдсан хог бүрийг түүж орон зайгаа дүүргэдэг газар биш. Мэргэжлийн ёс зүйгээ барьцгаая.