ШӨХТГ-ын дарга О.Магнай хууль бусаар халагдсан гэх есөн ажилчныхаа  талаар өнөөдөр мэдээлэл хийлээ.
 
-    Танай есөн ажилчин өөрсдийгөө хууль бусаар ажлаас халагдсан гэж ярьж байгаа. Та энэ талаар ямар тайлбар хийх вэ?

-    ШӨХТГ-ын байцаагч Мөнхсолонго гэгч эмэгтэй ажлаас халагдсан. Тэрээр Ерөнхийлөгчийн асуудлыг шалгасантай холбоотойгоор ажлаас халчихлаа гэж ярьж байгаа. Асуудлыг ингэж улс төржүүлэх шаардлага байхгүй ээ. Энэ эмэгтэйн талаар “Olloo” компанийн захирал  Батсүхээс надад гомдол ирүүлсэн. Тэрээр гомдолдоо “ШӨХТГ-ын байцаагч Мөнхсолонго нь Olloo ХХК-тай санал солилцон, харилцсан ба төрийн албан хаагчийн хариуцлаггүй харилцааны соёлгүй, хэтэрхий хувийн зан араншинг гаргаж, төрийн нэрийг урьдаа барин түрэмгийлж манай албан байгууллагыг дарамтлан ажилласан. Албан бичгээр ганц удаа харилцаагүй ба утсаар “Olloo” компанийн удирдах албаны гурван хүнийг дуудаж уулзан, онц гэмт хэрэг үйлдсэн хүн байгууллага мэт сэтгэгдэл төрүүлж, хуулинд заасан үйл ажиллагааг хаах, эсвэл дээд торгуулийг ноогдуулж байгаад ихэд гайхан арга буюу Мөнхсолонгод гомдолтой байгаагаа илэрхийллээ” гэсэн байсан. Миний хувьд төрийн алба бол үйлчилгээний байгууллага юм. Янз бүрийн байдлаар иргэд болон байгууллагыг хуулиас бусдаар дарамтлах, бүдүүлэг харилцах боломж бололцоог би хэнд ч олгохгүй. Үнэхээр ийм байдлаар иргэдтэй хандсан байвал би иймэрхүү арга хэмжээг цаашдаа ч авна. Энэ миний зарчмын байр суурь.

-    Бусад найман хүн нь бас ийм алдаа гаргасан юм уу?

-     Төрийн албаны байцаагч гэсэн нэр зүүчихээрээ иргэдтэй, аж ахуй нэгжүүдтэй  дээрэнгүй, балмад харьцдаг гэдгийг бид бүгд мэддэг байх. Гэхдээ манай байгууллагынхан ийм байдал гаргахгүй. Бусад ажилчдад ч  сахилгын шийтгэл ноогдуулж байсан. Ажил хийдэггүй хүмүүс байсан. Би тус албанд ирээд долоон сар болж байна. Энэ хугацаанд нэг ч хүнийг ажлаас халаагүй. Гэхдээ би нэг л зүйл хэлсэн. Харъя, хэн нь ажил хийж байна. Хэн нь ажилс хийхгүй байгааг харъя гэсэн. Өнгөрсөн хугацаанд ажлаа яаж хийдгийг харуулах хангалттай хугацаа байсан. Гэвч харамсалтай нь долоо, найман сарын хугацаанд юу хийдгээ харуулаагүй. Төрийн байгууллага бол хүн тэжээдэг газар биш. Төрийн албаны хуулиар хамгаалагдчихаад юу ч хийдэггүй хүмүүс энэ байгууллагад байх шаардлагагүй. Ажил хийдэггүй, санаачилгагүй хүмүүсийг л халсан. Төрийн албанд эрчтэй, хүчтэй, сэтгэлтэй хүмүүс ажиллах ёстой. Түүнээс нэг албан бичигт хариу өгчихөөд суудаг санал санаачилга гаргадаггүй, ажилдаа сэтгэлгүй ханддаг, ажлын цаг тасалдаг, ажил дээр унтдаг хүмүүстэй би хамтарч ажиллаж чадахгүй.

-    Та өөрийгөө хууль зөрчсөн шийдвэр гаргаагүй  гэж үзэж байна уу?

-    Үүнд хууль зөрчсөн нэг ч зүйл бахгүй. Бүгд хуулийн дагуу болсон. Ерөнхийлөгчийн сонгуулийн үеэр таарчихсан нь буруу зүйл болчих шиг боллоо.

-    “Olloo” ХХК ямар зөрчил гаргасан юм бэ?

-    Үнэхээр тодорхой мэдээлэл авахыг хүсвэл Olloo компанийн нөхдүүдээс асууж, тодруулж болно. Ямар нэгэн зөрчил хэн ч гаргаж болно. Гэхдээ бүдүүлэг харьцаж, ёс зүйгүй авирлах эрхийг хэнд ч хуулиар олгоогүй. Ёс зүйн талаар ярьж байна.

-    Бусад найман хүний хувьд үзэмжээр хандсан юм биш биз дээ?

-  Ажлаа хийдэггүй хүмүүс тодорхой байдаг юм. Ажил дээр унтдаг гэдгийг тодорхой хэлсэн. Бас санаачилга гаргадаггүй хүмүүсийг би ажил хийж байна гэж үзэхгүй.