ШУТИС болон ЭМШИУС зэрэг сургуулийн нэгдүгээр курсийн оюутнууд хэвлэлийн бага хурал хийж, сэтгүүлчдэд хандсан юм. Эдгээр оюутнууд өнгөрсөн онд олон улсын болон улсын олимпиадаас эхний гуравт орж,  их, дээд сургуульд улсын тэтгэлгээр сурах эрх авч байжээ. Ингээд бүгд хүссэн сургуульдаа орж нэгдүгээр курсээ төгсөх гэж байтал сургуулийн захиргаа нь улсаас тэтгэлэг чинь орж ирээгүй төлбөрөө төл хэмээн шаардах болжээ. Оюутнууд энэ талаар Төрийн сангаас тодруулахад  "2012 оны нэгдүгээр сарын 8-нд энэхүү тэтгэлгийг хүчингүй болгосон" гэсэн хариулт өгчээ. Харин Боловсрол, шинжлэх ухааны яаманд хандахад "та бүхэнд хоёр сонголт байсан. Нэг нь оюутан бүрт олгож буй урамшууллын 70 мянган төгрөгийг сонгох нөгөө нь төрийн сангийн тэтгэлэг. Харин та нар 70 мянгаа сонгосон байна"  гэсэн хариулт өгсөн байна. Тиймээс дээрх оюутнууд оюуныхаа хүч хөдөлмөрөөр хүртсэн төрийн сангийн тэтгэлэгээ хүртэж чадахгүйд хүрчээ. Оюутны 70 мянга бол төрөөс оюутан бүрт олгож буй урамшууллын мөнгө гэтэл хоёр сонголттой байсан хэмээх тайлбарыг эдгээр оюутнууд эсэргүүцэж байгаа юм байна. Ямартай ч тэд холбогдох хүмүүс нь энэ асуудлыг нь шийдэж өгөхийг хэвлэл мэдээллээр дамжуулж хүсч байгаагаа илэрхийллээ.