Эрдэнэт хотын гэр хорооллын айлууд интернэтэд холбогдлоо. Тодруулбал Монгол улсын Засгийн газраас хэрэгжүүлж буй “Гэр хорооллыг интернэтжүүлэх" төслийн ажил Эрдэнэт хотод өчигдрөөс хэрэгжиж эхэлсэн байна. Мэдээллийн технологи, шуудан, харилцаа холбооны газраас 2012 онд зарласан “Гэр хорооллыг интернэтжүүлэх” тендерт Орхон аймгийн “Агаарын суваг” ХХК шалгарч, гэр хорооллын Баянбулаг, Булаг, Цагаанчулуут, Рашаант, Наран, Их залуу, Шанд, Эрдэнэ багийн 1500 айл өрхөд интернэтийн үйлчилгээ үзүүлж эхэлжээ. Тэд энэ төслийн хүрээнд 1500 айл өрхөд нэг жилийн хугацаанд үнэ төлбөргүйгээр утасгүй интернэт ашиглах эрх олгож интернэтийн холболтын төхөөрөмжийг хэрэглэгчиддээ үнэгүй гардуулаад байгаа аж.

  Уг төслийн хүрээнд 6 дугаар сардаа багтаан Эрдэнэт, Дарханаас гадна 21 аймгийн төвийг үнэгүй, утасгүй интернэтийн бүстэй болгох зорилт тавин ажиллаж байгаа. 

Мөн "Сумдад өндөр хурдны, өргөн зурвасын түгээх сүлжээ байгуулах" төсөл 2014 он хүртэлх хугацаанд хэрэгжих бөгөөд интернэтгүй 250 сум, сууринг шилэн кабелийн болон тоон релейны дамжуулах сүлжээг ашиглан интернэттэй болгох юм. Энэ онд 52 сумыг интернэтэд холбоно.

24tsag.mn