ЮНЕСКО-гийн Монголын Үндэсний Комисс “MБШТӨВ ГАНДАНТЭГЧЭНЛИН ХИЙДИЙН НОМ СУДРУУДЫГ ХАДГАЛАН ХАМГААЛАХ НЬ” төслийг Нидерланд улсын Принц Клаус Сангийн дэмжлэгтэйгээр хэрэгжүүлэх гэж байгаа бөгөөд төслийн нээлт маргааш 11.00 цагт тус хийдийн номын санд болно. Нээлтийн ажиллагаанд ЮНЕСКО-гийн Монголын Үндэсний Комиссын Ерөнхий нарийн бичгийн дарга Г.Жаргалсайхан, МБШТөв Гандантэгчэнлин хийдийн тэргүүн, их хамба лам, гавж Д.Чойжамц, Да лам Х.Бямбажав, Соёл, Спорт, Аялал Жуулчлалын Яамны Соёлын өвийн хэлтсийн дарга Ц.Цэндсүрэн болон бусад зочид төлөөлөгчид оролцоно.
ЮНЕСКО-гийн Монголын Үндэсний Комисс Принц Клаус Сангаас зарласан сэргээн засварлах шаардлагатай, аюулд өртсөн соёлын үнэт өвийг хадгалан хамгаалах зорилго бүхий төсөлд Төв Гандантэгчэнлин хийдийн номын санг үргэлжлүүлэн засварлах ажлыг санал болгон нэр дэвшүүлсэн нь шалгаран зөвшөөрөгдсөн. Ийнхүү тус хийдийн номын санг сэргээн засварлаж улмаар хуучин, эвдэрч гэмтсэн ном судруудын тавиуруудыг олон улсын стандартын шаардлага хангасан, зориулалтын тавиуруудаар солих төдийгүй аюулгүй байдлын техник хэрэгслийг суурилуулахаар болжээ.

ЮНЕСКО сүүлийн жилүүдэд соёлын өвийг хадгалан хамгаалах асуудалд ихэд анхааран зохих арга хэмжээнүүдийг авч байгаа бөгөөд үүний нэг нь 2008-2012 оны хооронд хэрэгжүүлсэн “Зүүн Азийн орнуудын цаасан баримтат өвийг хадгалж хамгаалах, сэргээн засварлах нь” төсөл байлаа. Энэхүү төслийн хүрээнд “Цаасан баримтат өвийг хадгалан хамгаалж, сэргээн засварлах нь” сэдэвт цуврал онол практикийн сургалтуудыг зохион байгуулж байсан аж.