Хүнсний тусламж авдаг ядуу буурай орноос хүнс, хөдөө аж ахуйн техник, технологиороо дэлхийд тэргүүлдэг улс болж хөгжихөд голлох үүрэг гүйцэтгэсэн Бүгд Найрамдах Солонгос Улсын Хөдөөгийн хөгжлийн Удирдах газраас тус улсад өндөр бүтээмжтэй, эрчимжсэн, орчин үеийн хүнс, хөдөө аж ахуйн салбарыг хөгжүүлэх чиглэлээр хуримтлуулсан арга туршлага, техник, технологийн ололт амжилтаа хуваалцах зорилгоор Азийн Хүнс, Хөдөө аж ахуйн хамтын ажиллагааны санаачлага (AFACI Asian Food and Agriculture Cooperation Initiative) байгууллагыг 2009 оны 11-р сард байгуулсан юм.

Энэхүү байгууллагын гол зорилго нь Азийн бүс нутагт хүнсний үйлдвэрлэл, хөдөө аж ахуй салбарын тогтвортой хөгжлийг хангах, салбарын бүтээмжийг дээшлүүлэх замаар эдийн засгийн бие даасан салбар болгон хөгжүүлэхэд чиглэсэн техник, технологийн хамтын ажиллагааг хэрэгжүүлэх бүсийн хэмжээний механизмыг бий болгоход оршдог.

Одоогийн байдлаар Ази тивийн Бангладеш, Камбож, Лаос, Индонез, Монгол, Балба, Филиппин, Шри Ланка, Тайланд, Вьетнам, Узбекстан зэрэг Ази тивийн 12 улс орон тус байгууллагад элсэн орсон бөгөөд гишүүн орнуудын онцлогт тохирсон технологийг нэвтрүүлэх судалгааны төсөл хэрэгжүүлэх, сургалт, семинарыг зохион байгуулах, зөвлөх үйлчилгээ үзүүлэх зэрэг үйл ажиллагааг тус байгууллагаас санхүүжүүлэн хэрэгжүүлж байна.

Судалгааны төслүүд нь Пан Азийн, Бүсийн, тухайлсан улсын төсөл гэж хуваагддаг бөгөөд сургалт, семинар нь мэдээлэл солилцох, технологи дамжуулахад чиглэгдэж, харин зөвлөх харилцан солилцох хөтөлбөрт нь мэдлэг дамжуулах, боловсон хүчнийг чадавхжуулахад чиглэдэг.

2011 оны байдлаар Пан-Азийн 2 (11 оронд) бүсийн 3 (7 оронд), тухайлсан улс оронд 12 (11 оронд) төслийг хэрэгжүүлээд байна. Монгол Улсад лоолийн үр гарган авах, тариалангийн хөрс, усны менежментийн хөдөө аж ахуйн сайн дадал 9 төслүүд хэрэгжүүлж байгаагийн зэрэгцээ “Ази тивд ХАА-н технологийн мэдээллийн сүлжээ бий болгох”, “Органик аж ахуйг тогтвортой эрхлэх технологийн Азийн сүлжээ” зэрэг Пан-Азийн төслүүдэд хамрагдаад байна.

Азийн Хүнс, хөдөө аж ахуйн санаачилга байгууллага нь “Малын генетик нөөцийн үнэлэмж, ашиг шимийн үзүүлэлтийг сайжруулах” сэдэвт Пан-Азийн төслийг хэрэгжүүлэхээр төлөвлөж байгаатай холбогдуулан гишүүн орнуудын техник хамтын ажиллагааны төслийн төлөвлөлт хийх зөвлөлдөх уулзалтыг 2013 оны 5-р сарын 7-9-нд Улаанбаатар хотод зохион байгуулах юм. Бүсийн хэмжээнд энэхүү төслийг хэрэгжүүлснээр нутгийн малын үүлдрүүд, тэдгээрийн ашиг шим, тоо толгойн талаарх мэдээллийн бааз бүрдэж, орон нутгийн олдоцтой тэжээлийн нөөцөд түшиглэн малын тэжээллэгийг сайжруулах, бүтээмжийг нэмэгдүүлэх, үржлийн хөтөлбөрийн загварыг турших, чадавхи бэхжүүлэхэд зэргээр гишүүн орнууд хоорондоо малын генетик нөөцийн асуудлаар хамтран ажиллах боломж бүрдэнэ.

Энэхүү зөвлөлдөх уулзалтад Азийн Хүнс, хөдөө аж ахуйн байгууллагын тэргүүн, Вьетнамын Хөдөө аж ахуйн академийн ерөнхийлөгч Др.Нгуен Ван Бо, Үйлдвэр, хөдөө аж ахуйн яамны дэд сайд Ц.Туваан нар оролцолж нээж үг хэллээ.

Зөвлөлдөх уулзалтын үеэр Монгол Улсын малын генийн нөөц, удам гарвалыг сайжруулахад тулгамдаж буй асуудал, мал генетик нөөцийг хамгаалахтай холбогдуулан Монгол Улсад анх удаа боловсруулж буй хуулийн төслийн талаар илтгэл тавьж бүс нутгийн мэргэжилтнүүдээс зөвлөгөө, зөвлөмж авч зохион байгуулсанаараа онцлог юм.