Монгол Улсын Ерөнхийлөгч 2013 оны Шууд ардчилал, иргэдийн оролцооны жил хэмээн зарласан. Энэ ажлын хүрээнд Баянзүрх дүүргийн Засаг дарга Д.Пүрэвдаваа 2014 оны дүүргийн төсвийн зарцуулалтаар дүүргийнхээ нийт иргэдийн дунд санал асуулга явуулж эхэлсэн байна.  Тухайлбал, өнгөрсөн бямба гаригаас даваа гариг хүртэл 8,16, 26, 4, 7,19, 24, 9, 17 дугаар хорооны иргэдтэй Засаг дарга Д.Пүрэвдаваа уулзжээ. Иргэдийн хувьд дүүргийн Засаг дарга анх удаа өрх бүхэнд урилга өгөн өөрийн биеэр уулзаж, асуудлыг нь сонсч, тодорхой зарим асуудлыг нь газар дээр нь шийдвэрлэж, хариулт хүссэн асуултад нь хариулж, ирэх оны төсөвт иргэдийн саналыг авч байгаад талархаж байгаагаа хэлж байгаа гэнэ.

Харин иргэдийн зүгээс гэр хорооллын иргэд борооны дараа үүссэн шавар шавхай, бас хаа сайгүй бий болчихдог хогны асуудал ихээхэн бухимдал үүсгэдэгийг онцолжээ. Мөн гэр хороолол гэлтгүй бүхий л хороололд хамгийн дутагдалтай зүйл явган хүний зам, хүүхдийн цэцэрлэг, сургууль, хогийн асуудал байгааг тэд Засаг даргад уламжилсан байна.

Засаг даргын хувьд 2013 оны дүүргийн төсвийн зарцуулалтыг иргэд танилцуулан, манай дүүргийн хувьдсургууль, цэцэрлэг хүрэлцээ муутай байгааг онцолж, энэ онд хоёр сургууль, долоон цэцэрлэг барихаар төсөв хөрөнгө нь шийдэгдсэн. Удахгүй газрын асуудал шийдвэрлэгдэхээр энэ асуудал цэгцэндээ орох боломжтой болсныг мэдэгдсэн байна. Тэрбээр мөн иргэн бүр хороондоо, хороололдоо сэтгэл хангалуун сайхан амьдрахад өөрсдийнх нь оролцоо чухал байгааг онцолж, энэ утгаараа ирэх жилийн төсөвт нэн түрүүнд хийгдэх ажлуудад иргэдийн санал, оролцоо чухал байгааг онцолжээ.

Хорооны иргэдтэй уулзсан Засаг даргын уулзалтын үеэр иргэдийн зүгээс газрын маргаантай асуудлаар ихээхэн гомдол санал гаргаж байсан гэнэ. Засаг даргын зүгээс Монгол Улсын иргэн хэн ч бай хуулийн дагуу газар өмчлөх, эзэмших эрх бий. Гэхдээ холбогдох хуулийн хүрээнд эрхээ эдэлж, хуулиа дагах ёстойг сануулан газартай холбоотой аливаа маргааныг хэн нэгэн даргатай яриад шийдвэрлэх боломжгүй, тиймээс зарим асуудлыг шүүхээр шийдвэрлүүлэх шаардлага гарч байгааг хэлжээ..