Энэ жил элсэлтийн ерөнхий шалгалт /ЭЕШ/ өгөхөөр 43800 хүүхэд бүртгүүлсэн бөгөөд www.eec.mn цахим хуудаст ирэх сарын 1-нд шалгалтын дүн, оноог байршуул юм байна. БШУЯ-ны харъяа Боловсролын үнэлгээний төв элсэгчдийг улсын хэмжээнд 52 шалгалтын байранд хуваарилан, шалгалт авах бэлтгэл ажлаа бүрэн хангажээ. Математик, физик, химийн даалгаврын гүйцэтгэх хугацаа 100 минут. Монгол улсын түүх, монгол хэл, англи хэл, орос хэл, биологи, газар зүй, нийгмийн тухай мэдлэг хичээлийн гүйцэтгэх хугацаа 80 минут байна. Шалгалтыг энэ сарын 14-16-нд улс орон даяар нэгэн зэрэг явуулах юм.
“Ирэх баасан гарагт эхлэх шалгалтад орох сурагчид бүртгэлийн хуудас, шар хуудас, бүрэн дунд боловсролын гэрчилгээ /хувь/, иргэний үнэмлэх зэргийг бүрдүүлсэн байх ёстой. Харин иргэний үнэмлэх авах нас нь хүрээгүй бол суралцаж буй сургууль болон харьяа хороо, дүүргийн Засаг даргын тодорхойлолттой байна. Мөн бүртгэлийн хуудас нь тамга дарж, гарын үсэг зурж баталгаажсан байна. ЭЕШ зургадугаар сарын 16-нд дууссанаас хойш Боловсролын үнэлгээний төвд бүх шалгалтын хуудсыг төвлөрүүлдэг. Үүний дараа нэгдсэн журмаар шалгагч машинаар шалгуулагчдын материалыг уншуулна. Ирэх долдугаар сарын 1-ний өглөө есөн цагт www.eec.mn цахим хуудсанд шалгуулагчдын дүн, оноог байршуулна. Шалгуулагч хувийн мэдээллээ оруулахдаа утасныхаа дугаарыг ашиглан Боловсролын үнэлгээний төвийн тусгай 133233 дугаарт мессеж илгээж хэрэгтэй мэдээллээ авах боломжтой. Үүнээс гадна шалгалтын хувиар, шалгалт өгөх анги танхим, суудлын дугаарын мэдээлэл, шалгалтын дүн болон онооны мэдээллийг мессежээр авч болно.“ хэмээн Боловсролын үнэлгээний төвөөс мэдээлж байна.
