Нягтрал их байх нь эрүүл ахуйн халдвар хамгаалалын бүхий  л боломжийг үгүй хийж цаашлаад хүүхдийн хөдөлгөөнийг хязгаарлан, өөрөөний агаарын солилцоог муутгахад нөлөөлдөг байна. Тиймээс хүүхдийг амьсгалын замын халдварт өвчин тусах магадлалыг өндөр болгож өгдөг аж. Тухайлбал цэцэрлэгийн ахлах ангид 25 хүүхэд байх ёстой байдаг байна. Гэтэл одоо нийслэлийн ихэнхи цэцэрлэгүүдийн нэг ангид 45-50 хүүхэд сурч байгаа гэнэ. 

Тус зөрчил нь цэцэрлэгийн хүртээмж муу байгаатай шууд холбоотой гэж МХЕГ-аас хэллээ. Тиймээс цэцэрлэгийн хүртээмжийн асуудлыг төр засгийн бодлогоор даруй шийдэхгүй бол хүүхдүүдийн дундах халдварт өвчин улам нэмэгдэж, эрүүл ахуйн байдалд нь сөргөөр нөлөөлөх боломжтой гэнэ.

МХЕГ-аас хүүхдүүдийн дундах өвчлөлийг нь 11 чиглэлээр судалж үзэхэд нийт өвчлөлийн 60-70 хувийг амьсгалын замын халдварт өвчин эзэлсэн байна. Мөн суултуур зэргээс гэдэсний халдварт өвчин ч даамжирах боломжтой гэнэ. Энэ нь хүүхдүүдийн нягтралтай шууд холбоотой аж. Хүүхэд эрчимтэй хөдөлж, хүчилтөрөгчийг чөлөөтэй авч байж бодисын солилцоо нь эрчимтэй явагдаж, эрүүл саруул өсч бойжих ёстой.

Сүүлийн үед төр засгаас цэцэрлэгийн хүртээмжийн асуудлаар янз бүрийн бодлого шийдвэр гаргаж байна. Тэр дундаа гэр цэцэрлэг барих тухай асуудлыг илүүд авч үзэж байгаа. Гэхдээ гэр цэцэрлэгийг чанарын шаардлага хангасан сайн цэцэрлэг болж чадахгүй гэж мэргэжилтэн хэллээ. Учир нь гэр цэцэрлэгт эрүүл ахуй, халдвар хамгааллын нөхцөл хангагдахгүй гэнэ. Тухайлбал ус, хог, хоол боловсруулах техник хэрэгслийн асуудал нилээн бэрхшээлтэй болж байгаа учраас сайн зохион байгуулалттай  хийх хэрэгтэйг МХЕГ-аас санууллаа.

Тиймээс МХЕГ-аас цэцэрлэгүүдийг хоол хүнсээр ханган нийлүүлдэг газруудын талаар БШУ-ны яам, Эрүүл мэндийн яам, НЗДТГ-т саналаа явуулсан байна.  Тухайлбал нийслэлийн цэцэрлэгүүдийн ханган нийлүүлэх байгууллагын зарим нь ашиглалтын шаардлага хангахгүй барилгад үйл ажиллагаагаа явуулж байгаа аж. Үүнийг засч сэргээлгэх хүсэлтийг МХЕГ-аас Нийслэлийн удирдлагуудад тавьж байгаа юм байна. Мөн цэцэрлэг бүрийг эмчтэй болгох хүсэлтийг ЭМЯ-нд тавьжээ.

Тус шалгалтад хамрагдсан байгууллагуудад шалгалт хийхэд ихэнхи 50 жил болсон хуучин муу барилга дотор үйл ажиллагаагаа явуулж байжээ. Тиймээс БШУ-ны яаманд тус барилгуудыг шинэчлэх, өргөтгөн засвар хийхийг хүсэлтийг хүргүүлжээ.

Нийт зөрчил илэрэн бүх байгууллагуудад нийтдээ 2 сая төгрөгийн торгууль ноогдуулжээ.