Монгол Улсын Их Хурлын 2010 оны 7 дугаар сарын 07-ны өдрийн 39 дүгээр тогтоолыг хэрэгжүүлэх Тавантолгойн нүүрсний орд газрыг иж бүрнээр нь ашиглах цогц төлөвлөгөөний нэг хэсэг болох “Эрдэнэс ТТ” ХК-ны Цанхийн зүүн хэсэгийн уурхайг түшиглэн жилд 20 сая тоннын хүчин чадалтай Нүүрс баяжуулах үйлдвэр барих зураг төсөл, техник эдийн засгийн үндэслэлийг өнөөдөр Уул уурхайн яамны дэргэдэх Эрдэс баялагын мэрэгжилийн зөвлөлийн хурлаар хэлэлцэж баталжээ.

Үйлдвэрийн зураг төсөл, ТЭЗҮ-ийг 2012 оны 09 дүгээр сараас эхлэн “Эрдэнэс ТТ” ХК-ий Нүүрс баяжуулах төслийн баг, АНУ-ын Аусэнко Таггерт компани болон үндэснийкомпанийн төлөөлөл болох Уул уурхайн зөвлөх үйлчилгээний “Ай Эм Кэй” ХХК болон уул уурхайн зураг төсөл, барилга байгууламж угсралтын “Гранд Повер” ХХК-ниудтай хамтран боловсруулжээ.
Төслийн ерөнхий удирдагчаар “Эрдэнэс ТТ” ХК-ий Нүүрс баяжуулах төслийн удирдагч Л.Батсүх ажиллаж төслийн зөвлөхөөр “Ай Эм Кэй” ХК-ний захирал Монгол улсын зөвлөх инженер Д.Баярсайхан, ШУТИС-ын УУИС-ын баяжуулалтын багийн ахлах, Монгол улсын зөвлөх инженер, доктор профессор Б.Алтантуяа, Эрдэс боловсруулалтын хүрээлэнгийн захирал, Монгол улсын зөвлөх инженер, доктор профессор Г.Бадамхатан,  ШУТИС-ын УУИС-ын уул уурхайн цахилгаан хангамжийн багийн ахлах, Монгол улсын зөвлөх инженер, доктор профессор Б.Эрдэнэцэцэг, Монгол улсын зөвлөх инженер, Ж.Очир нараар удирдуулан “Эрдэнэс ТТ” ХК болон “Ай Эм Кэй” ХХК, “Гранд Повер” ХХК-ний хамтарсан төслийн баг ажиллажээ.

Энэхүү баяжуулах үйлдвэрийн техник эдийн засгийн үндэслэлийг батлуулсанаар “Эрдэнэс ТТ” ХХК нь 2015 оноос эхлэн жилд 5 сая тонн баяжуулсан нүүрс үйлдвэрлэж борлуулах бөгөөд цаашдаа хүчин чадал нь жил тутамд нэмэгдэж 2017 онд жилд 20 сая тонн болж өргөжих юм.