Монголын Хөлбөмбөгийн холбоо "Хүүхэд-Хөлбөмбөг-Ирээдүй" нэртэй  хөлбөмбөгийн зуны сургалт явуулж эхэлжээ. Хүүхдийн хөлбөмбөгийг хөгжүүлэх зорилготой энэхүү сургалт зургадугаар сар дуустал явагдах юм байна. Сургалтад  6-12 насны хүүхэд багачууд хамрагдах бүрэн боломжтой юм.

Монголын хөл бөмбөгийн холбооны талбайд зохион байгуулагдах тус сургалтад хамрагдах хүсэлтэй хүүхдүүдийн бүртгэл өдөр бүр явагдаж буй аж.  Азийн Хөлбөмбөгийн Холбооны өндөр зэрэглэлийн дасгалжуулагч нар хөлбөмбөгийн анхан шатны хичээл зааж, чөлөөт тоглолтуудыг хийлгэх гэнэ. Зуны урин дулаан цаг ирж, сургуулиудын  амралт эхэлсэн энэ өдрүүдэд эцэг эхчүүд бяцхан үрсээ дагуулан очиж,  мэргэжлийн дасгалжуулагч нартай хамт хөлбөмбөг тоглуулж, ирээдүйн хөлбөмбөгчин болох замыг нь нээх сайхан боломж ийнхүү бүрджээ. Энэхүү сургалт нь үнэгүй ажээ.

Охид хөвгүүдээ хөлбөмбөгийн зуны сургалтад үнэ төлбөргүй хамруулахыг хүссэн эцэг эхчүүд Төв цэнгэлдэх хүрээлэнгийн урд байрлах Монголын Хөлбөмбөгийн Холбооны байранд даваагаас баасан гарагуудын 10.00-12.00, 14.00-16.00 цагуудад очиж болно хэмээн Монголын Хөлбөмбөгийн холбооноос мэдээллээ.