Монгол, Австри улсуудын хооронд дипломат харилцаа тогтоосны 50 жилийн ойд зориулсан соёлын үйл ажиллагаа энэ сарын 15-27-ны өдрүүдэд зохиогдож байгаа юм. Тэгвэл арга хэмжээ нь өнөөдрөөс эхлэн УДБЭТ удирдан зохион байгуулж байна. Уг соёлын үйл ажиллагааг ССАЖЯ, Бээжин дэх Австрийн ЭСЯ, Австрийн Боловсрол, Соёл урлагийн яам, Австрийн урлагийн форум зэрэг газрууд дэмжин ажиллаж байгаа юм байна. Монгол-Австри улсуудын харилцаа, хамтын ажиллагаанаас хамгийн өргөн хүрээтэй, нэр хүндтэй нь урлаг, хөгжмийн хүрээний хамтын ажиллагаа байдаг аж. Монголын хөгжмийн сапбарын уран бүтээлчдийн урын сангийн томоохон хэсгийг Австрийн алдарт хөгжмийн зохиолчдын бүтээл эзэлдэг билээ. Тиймээс дипломат харилцааны хүрээнд хийж буй соёлын үйл ажиллагааны хөтөлбөрт Монгол, Австрийн уран бүтээлчид хамтарсан мастер класс, залуу уран бүтээлчдэд зориулсан сургалт, нэгдсэн Гала концерт багтжээ.

Энэхүү ажлын хүрээнд Австри улсаас удирдаач Жожи Хаттори, хормейстр, удирдаач Жералд Вөрт, дуурийн найруулагч, Венийн Хөгжмийн их сургуулийн багш Беверли Бланкеншип, босоо ятгачин, багш Тина Зердин, виоленчель хөгжимчин Ута Корфф нар хүрэлцэн ирнэ. Удирдаач, хийлч Жожи Хаттори Гала концертыг Монголын удирдаачидтай хамтран удирдах бол Венийн эрэгтэй найрал дууны ерөнхий удирдаач Жералд Вөрт УДБЭТ, ЦДБЭЧ, ХЦДБЧ зэрэг байгууллагуудын найрал дуучидтай хамтран ажиллаж мөн Гала концертонд найрап дууны томхон бүтээлүүдийг удирдана.