Наадмын үеэр 5000 биелээч биелж Гиннесийн дээд амжилт тогтоохоор Ерөнхий боловсролын сургуулийн сурагчдад биелгээ зааж эхэлсэн билээ. Наадам ч ойртож, энэ үйл явдалд оролцохоор удаан бэлдсэн хүүхдүүд орон нутгаас ирж байгаа ч эхнээсээ гудамжинд хонохдоо тулжээ. Эдгээр биелээчдийн хоол ундны зардлыг зохион байгуулагчид гаргаж байгаа бол унааны зардлыг нь орон нутгийн төсвөөс гаргаж байгаа юм. Харин Улаанбаатар хотод ирээд байрлах байр нь сургууль. БШУ-ын яамнаас орон нутгаас ирсэн биелээч хүүхдүүдийг сургуульд байлгана гэсэн ч тэр нь модон шалтай, унтах газар ч үгүй тул хүүхдүүд ихэд зутарч байгаа аж. Тухайлбал Архангай аймгаас ирсэн 80 гаруй хүүхэд засвар нь эхэлсэн сургуульд байрлаж чадахгүй, Сүхбаатарын талбай дээр хоёр хоножээ. Зарим иргэд ч үүнд сэтгэл зовж асуудлыг шийдтэл гэртээ хонуулахаар болсон байна.

    Энэ Гиннесийн номд бичүүлэх үйл ажиллагаа 250 сая гаруй төгрөгийн төсөвтэй бөгөөд хүүхдүүдийн орон байрны асуудалд нэг ч төгрөг төсөвлөөгүй, зөвхөн сургуульд байрлуулахаар заажээ. Наадам эхлэхэд зургаан хоног дутуу байгаа тул эдгээр хүүхдүүдийн асуудлыг яаралтай шийдэхгүй бол хүүхдүүд бороо, шороонд цутарч гүйцэх нь. Зарим нь гэртээ харих тухай үг цухуйлгаж эхэлсэн гэнэ. Эцэг, эх нь дэлхийн түүхэнд бичигдэх Гиннесийн амжилтын номд орох бахдам үйл явдалд хүүхдээ оролцуулах гэж явуулснаас хүйтэн шалан дээр, будагтай сургуульд хонуулна гэж зүүдлээ ч үгүй байгаа биз ээ. Бид биелээч хүүхдүүдийн асуудал хэрхэн шийдэгдсэн талаар эргэн мэдээлнэ.