Урианхай сурын дээд амжилтыг 30 сумнаас 30 онож Ховд аймгийн Мөнххаан сумын уугуул, “Хурд мөнхтүшиг” компанийн харваач, спортын мастер Цэвээндоржийн Батзориг тогтоолоо. Үүнээс өмнө дөрвөн удаа дээд амжилтыг тогтоосон байдаг юм. Үүнд: 1994 онд 30 сумнаас модон хавчаахай нумаар 24 онож Давааням,  2004 онд 26 онож улсын мэргэн Хонгор , 27 онож Батгэрэл, өнгөрсөн жил 28 онож дээд амжилтыг тогтоогоод байсан юм. Ийнхүү Ховдоос дээд амжилт тогтоосон бол  Р.Ганзориг, З.Баярсайхан, Ц.Нэргүй, Ш.Баянмөнх, Ч.Жаргалсайхан, Ц.Одбаатар, У.Эрдэнэбат, Т.Хаянхирваа нарын найман спортын мастер төрж тунч одтой наадацгаалаа. Энэ үеэр бид шинэ амжилтын эзэн сортын мастер Ц.Батзоригоос баярын сэтгэгдлийг нь сонссон юм.

-Шинэ амжилтын эзэн боллоо. Баяр хүргэе?

-Сайхан байна.  Монгол наадмын сурын дэвжээнээ дөрөв дэх жилдээ ирж харваж байна. Энэ жил ийм сайхан амжилтын эзэн  болсондоо баяртай байна.  Хэлэх үг олдохгүй л байна даа. Миний анхны сурын багш манай нутгийн Ууган гэж хүн бий. Ууган багшийнхаа нум сумаар анхны сумаа тавьж эхлүүлж байлаа. Лхагвасүрэн, Батгэрэл мэргэн нарын сайхан сайхан хүмүүс бүгд  л миний багш нар байгаа юм.  Энэ дашрамд багш нартаа талархаж буйгаа дамжуулаад намайг таньдаг нутгийн ард түмэндээ баяр наадмыг мэндийг дэвшүүлж, сайхан наадаарай  гэж хэлье.

-Сурын спортоор хичнээн жил хичээллэж байна вэ?

-11 дэх жилдээ хичээллэж байна.  Анх 2009 онд улсын наадамд ирж харваад спортын мастер болж байсан. Түүнээс дөрвөн жилийн дараа амжилтаа ахиуллаа. Энд сонирхуулахад манай аймагт сур сүүлийн жилүүдэд их сайн хөгжиж байгаа.  Өнөөдөр гэхэд манай аймгаас 18 харваачид харваж байна.

-Баярлалаа. Дараа дараагийн харваанд амжилт хүсье.