Дэлхийн хүн амын өдрийг жил бүрийн 7 дугаар сарын 11-ны өдөр тэмдэглэн өнгөрүүлдэг уламжлалтай. Энэхүү тэмдэглэлт өдөртэй холбогдуулан НҮБ-ын Хүн амын сангийн суурин төлөөлөгч Аржентина Матавел Пичин, ХАХНХЯ-ны Төрийн нарийн бичгийн дарга Б.Отгонжаргал, Эрүүл мэдийн дэд сайд Ж.Амарсанаа, Монголын оюутны холбооны ерөнхийлөгч Х.Батсайхан болон залуучуудын байгууллагын төлөөлөл хамтран хэвлэлийн бага хурал хийлээ.

   Хүн амын өдрийн дэлхийн нийтийн анхаарлын төвд буй асуудлыг уриа болгон, түүнд чиглэсэн үйл ажиллагаа хийхээр тэмдэглэн өнгөрүүлдэг. Тиймээс энэ жилийн Хүн амын өдрийг “Өсвөр насны охидын жирэмслэлт” сэдвийн дор тэмдэглэхээр болжээ.

   Учир нь өсвөр насандаа жирэмсэлснээс болж олон мянган охид өөрийн сурч боловсрох, ирээдүйд сайн сайхан амьдрах боломжоо алдаж, жирэмсэн болсноо нуун дарагдууж, айж, эмээснээс шалтгаалан цусны даралт ихсэх, цус багадах, хүүхэд дутуу төрөх зэрэг эрүүл мэндийн хүндрэлүүд бий болж , хохирч байна.

   Манай улсын хувьд 1990 оноос хойш өсвөр насны охидын төрөлт буурсан боловч 2005 оноос өссөн үзүүлэлт байна. Энэ нь манай улсын өсвөр насны охидын төрөлт Зүүн Азийн орнууд дундаа харьцангуй өндөр үзүүлэлт болж байна.

   Харин дэлхий дээр амьдарч буй 600 сая гаруй охидын 500 орчим сая нь хөгжиж буй орнуудад амьдардаг байна. Тэднээс жил бүр 15-19 насны 16 сая охид хүүхэд төрүүлж, энэ насны охидын дунд жирэмслэлт, төрөхийн хүндрэлтэй холбоотой эндэгдэл улам бүр ихсэх хандлага ажиглагдаж байгаа юм.

   Тиймээс өсвөр насны охидыг хүсээгүй жирэмслэлтээс урьдчилан сэргийлэх, тэдэнд нөхөн үржэхүйн мэдлэг, боловсрол олгох шаардлагатай байгааг хуралд оролцогчид онцлон хэлж байсан. Энэ хүрээнд Монголын өсвөр үе, залуучуудын насных нь онцлогт тохирсон бэлгийн цогц боловсрол олгож, насан туршдаа эрүүл мэндээ хамгаалах мэдлэг, чадварыг эзэмшүүлэх, эрүүл мэндийн үйлчилгээг хүртээмжтэй, чанартай болгоход анхаарах зургаан сарын аяны үйл ажиллагааг Дэлхийн хүн амын өдөртэй холбогдуулан эхлүүлж байгаа юм байна.