Ардын хувьсгалын 92 жилийн ой, Үндэсний их баяр наадмын босгон дээр эх орныхоо тусгаар тогтнолын төлөө тэмцэж явсан зарим ахмад дайчдадаа хүндэтгэл үзүүлж, орон сууц худалдан авахад нь дэмжлэг үзүүлэх зорилгоор 35 сая төгрөгийн нэг удаагийн буцалтгүй мөнгөн тусламжийг өчигдөр Нийгмийн хамгаалал, хөдөлмөрийн яаман дээр гардуулан өглөө. “Дайнд оролцсон ахмад настнуудын талаар авах зарим арга хэмжээний тухай” Ерөнхийлөгчийн зарлиг 2008 онд батлагдан, хэрэгжиж эхэлснээс хойш буюу 2009- 2011 оны хооронд 1600 гаруй ахмад дайчдын орон сууцны дэмжлэгт улсын төсвөөс 56.7 тэрбум төгрөгийг зарцуулжээ.
Энэ оны улсын төсөвт 30 ахмад дайчны орон сууцны дэмжлэгийн хөрөнгө болох нэг тэрбум 50 сая төгрөгийг тусгуулан батлуулсан бөгөөд Чөлөөлөх дайны ялалтын түүхт 68 жилийн ойн өдөр буюу өнгөрсөн тавдугаар сарын есөнд 21 ахмад дайчин болон тэдний ар гэр, үр хүүхдэд тус бүрт нь 35 сая төгрөгийн мөнгөн тусламж олгожээ.

Харин энэ удаад С.Гомбожав, Ж.Донормаа, Я.Галдан, Г.Баарай нарын ахмад дайчдад мөнгөн тусламж олголоо. Тэдгээрийн хамгийн ахмад нь 1939 оны Халх голын байлдаанд оролцож явсан, 98 настай С.Гомбожав гуай бол хамгийн залуу нь улсын баруун хил дээр 1940-1948 онд болсон зэвсэгт тулгаралтад оролцож явсан, 83 настай ахмад дайчин Г.Баарай  гуай байв.