Дэнж хотойтол наадах дэлхийд ганц монгол наадам сайхан болж өндөрлөлөө. Өнөө жилийн улсын баяр наадам нартай, хуртай, өргөн дэлгэр, өнгөтэй сайхан болж, шандаст хурдан хүлгүүд нь шижир алтан зурхайд тоосоо өргөж, сур мэргэн харваачид сумаа тавьж, наадмын зүлэг ногоон дэвжээнээ шинэ аварга мэндэлж, зон олон маань хотол олноороо өргөн дэлгэр наадлаа.
Монгол Улсын Ерөнхийлөгч Ц.Элбэгдорж, УИХ-ын дарга З.Энхболд, Ерөнхий сайд Н.Алтанхуяг тэргүүтэй төр засгийн түшээд Төв цэнгэлдэх хүрээлэнгийн төв асарт тухлан төр, түмэн баяр наадмаа ёслол төгөлдөр тэмдэглэлээ.
Хурсан олон наадамчид энэ жилийн наадамд үнэхээр ам сайтай байлаа.  Уламжлал ёслоор  эр бяртай хүчит бөхчүүд наадамчин олноо цэнгүүлж, эрэмгий хурдан хүлгүүд түрүү магнайд орж,  эрчит сумаа онилсон  мэргэн харваачид нь цолоо нэмүүлж баярлалаа.
Ингээд та бүхэнд морин уралдааны түрүү авсан хурдан хүлгүүд, хэнээс ч илүү онч мэргэн байсан харваачид, уран мэх, хүч бяраараа илүүрхэж цолоо нэмүүлсэн бөхчүүдийг танилцуулж байна.

Улсын аварга нэг, улсын гарьд нэг, улсын заан нэг, улсын харцага гурав, улсын начин хоёр,  төрлөө
 Улсын баяр наадмын хүчит бөхийн барилдаанд 512 бөх зодоглосноос Сэлэнгэ аймгийн Мандал сумын харьяат Г.Эрхэмбаяр түрүүлж, Завхан аймгийн Их-Уул сумын харьяат Б.Гончигдамба үзүүрлэснээр улсын гарьд цол хүртсэн билээ.

Улсын аварга:
Г.Эрхэмбаяр /Сэлэнгэ аймгийн Мандал сум/

Улсын гарьд:
Б.Гончигдамба /Завхан аймгийн Их-Уул сум/

Улсын заан:
Б.Батмөнх /Төв аймгийн Баянхангай сум/

 Улсын харцага:
Н.Түвшинбаяр /Булган аймгийн Сайхан сум/
Н.Батсуурь /Увс аймгийн Ховд сум/
Э.Оюунболд /Хэнтий аймгийн Өмнөдэлгэр сум/

Улсын начин:
Т.Баасанхүү /Увс аймгийн Тэс сум/
Л.Цэрэнтогтох /Говь-Алтай аймгийн Цогт сум/

Шагайн харваанд “Ажнай” клуб тэргүүллээ
Энэ жилийн наадмын шагайн харваанд 42 багийн 360 гаруй харваач цэц мэргэнээ сорьсоноос Өмнөговь аймгийн “Ажнай” клубын Ц.Идэрмөнх ахлагчтай баг тэргүүлэн алтан медаль, өөрсдийн нэрийг босоо бичгээр мөнхөлсөн калиграф бүхий дурсгалын өргөмжлөлийн хамт гардан авсан билээ. Тус багийн ахлагч Ц.Идэрцог, багийн гишүүн Н.Захирахбаатар, Ү.Дэмүл нар улсын гарамгай мэргэн, Б.Намсрайжав, Б.Наранхүү нар “Улсын мэргэн” цол тэмдгээр шагнуулав.
Энэ жилийн баяр наадмаар спортын мастер гурав, дэд мастер нэг, хошой мэргэн нэг, гоц мэргэн цолтой нэг хүн шинээр төрөв
Сурын эрэгтэйчүүдийн шигшээ найман харваач цэц мэргэнээ сорьсноос  Л.Отгонбаяр 40 сум тавьж 35 оносноор түрүүлж Хошой мэргэн цол хүртсэн юм.
Эмэгтэй харваачдаас Хэнтий аймгийн Дадал сумын харваач, хошой мэргэн Х.Оюунчимэг гурав дахь жилдээ түрүүллээ.

Дааганы уралдаанд 229 хурдан буян бүртгүүлж, 166  хурдан даага гарааны зурхайгаас эргэсэн.  Ингээд Өмнөговь аймгийн Ханбогд сумын уугуул аймгийн Алдарт уяач Нэргүйн Амарбаясгалангийн хул даага түрүүсэн. Хул даагыг 1255 дугаартай 9 настай Мөнхбатын Оюунгэрэл охин унаж түрүү магнайд хурдлуулсан юм.

Хийморь цогцолсон соёолон насны морьдоос Ховд аймгийн Мөнххайрхан сумын уугуул аймгийн Алдарт уяач Ширнэнбандийн Адьшаагийн хонгор үрээ түрүү магнайдаа тоосгүй түрүүлэн ирж хурсан олноо цэнгүүлсэн билээ.

Говь-Алтай аймгийн Шарга сумын уугуул Алтай констракшиний Х.Бат-Эрдэнийн хүрэн морь их насны морьдын түрүүг авч, хурсан олныг цэнгүүлсэн юм.

Шүдлэнгийн уралдаанд 296 хурдан буян бүртгүүлж, 266  үрээ гарааны зурхайгаас эргэсэн байна.

Ингээд Сэлэнгэ аймгийн Баруунбүрэн сумын уугуул, Данзандоржийн Одхүүгийн хээр шүдлэн түрүүллээ.

Их Монгол улс байгуулагдсаны 807, Үндэсний их баяр наадмын хязаалан насны морьдын уралдаанд  Монгол Улсын алдарт уяач Д.Хишигжаргалын шарга үрээ түрүүлсэн.

Гал бутартал дүүлж, газар эвхэн хурдалсаар сүргийн манлай хурдан азаргануудын магнайд Өмнөговь аймгийн Цогтцэций сумын уугуул Монгол улсын Манлай уяач Д.Бат-Эрдэнийн “Улс” халзан хурдалж, уясан эзэн, унасан хүүхэд наадамчин олноо цэнгүүллээ.

Ийнхүү Монгол түмэн үүх түүхээрээ бахархаж, өв уламжлалаараа гайхуулан, эх орныхоо ирээдүйн хөгжил дэвшилд итгэл дүүрэн, өег тэнүүн сайхан наадлаа.