Тулгар төр байгуулагдсаны 2222 , Их Монгол улсын 807, Ардын хувьсгалын 92 жилийн ойн Үндэсний их баяр наадмын аймгуудын хүчит бөхийн барилдааны тоймыг хүргэж байна.

  Хөвсгөл аймагт Б.Хаш-Эрдэнэ түрүүлж аймгийн арслан цол хүртэв
 Улсын баяр наадамтай давхацсан Хөвсгөл аймгийн баяр наадамд Бүрэнтогтох сумын харьяат аймгийн начин Б.Хаш-Эрдэнэ түрүүлж аймгийн арслан цол хүртжээ. Харин Арбулаг сумын харьяат аймгийн арслан Г.Батням дахин үзүүрлэсэн байна. Их шөвөгт шалгарсан аймгийн начин Л.Энхбат харцага цолонд хүрснээс гадна Г.Бат-Орших, Ц.Сандагдорж, Б.Даваа-Очир, Ц.Сэдбазар нарын сумын шилдэг дөрвөн заан аймгийн начин цолонд хүрчээ.

Говь-алтай аймагт цэргийн харцага Б.Хишигбаатар түрүүлжээ
Говь-Алтай аймгийн баяр наадам энэ сарын 10-нд зохиогдож 256 бөх зодоглосноос цэргийн харцага Б.Хишигбаатар найм даван түрүүлж аймгийн арслан цол хүртсэн бол аймгийн харцага Ц.Бямба-Очир үзүүрлэн аймгийн заан цолонд хүрлээ. Сумын уран барилдаант заан Ц.Эрхэмбаяр зургаа давж аймгийн харцага болжээ. Тус наадмаар Бигэр сумын харьяат Ц.Эрхэмбаяр аймгийн харцага, Чандмань сумын харьяат Б.Хишигбаатар аймгийм арслан, Бугат сумын харьяат Ц.Бямба-Очир нар аймгийн заан цол хүртсэн бол залуу бөх Б.Жавхлан, Д.Азбаатар, Э.Мэргэншагай нар аймгийн начин болжээ.

Баянхонгор аймгийн наадамд а.х Б.Бат-Амгалан түрүүлж аймгийн арслан болов
Долдугаар сарын есөнд болсон Баянхонгор аймгийн наадамд тус аймгийн Баянговь сумын харьяат аймгийн харцага Б.Бат-Амгалан одтой сайхан барилдан түрүүлж аймгийн арслан цол хүртсэн бол Баянбулаг сумын харьяат сумын заан Н.Золбоо үзүүрлэж аймгийн заан болсон байна. Богд сумын Ж.Энхбаатар, Баянбулаг сумын А.Отгонбаатар зургаа даван аймгийн харцага, Говь-Алтай аймгийн Тайшир сумын харьяат А.Батзориг, Баянхонгор аймгийн Шинэжинст сумын Б.Өнөрбаатар, Баянхонгор аймгийн Баянлиг сумын Э.Анхбаяр, Архангай аймгийн Тариат сумын харьяат Г.Болдгэрэл нар тав даван аймгийн начны болзлыг хангажээ.

Дундговь аймагт дөрвөн аймгийн начин төржээ
Дундговь аймгийн баяр наадамд аймгийн заан Т.Занданбат түрүүлж аймгийн арслан цолонд хүрч, аймгийн харцага Б.Бат-Эрдэнэ үзүүрлэж аймгийн заан болжээ. Их шөвөгт аймгийн заан Ч.Бүрэнзэвсэг шалгарч цолоо баталсан бол сумын заан Б.Доржсүрэн аймгийн харцага цолны болзол хангасан байна. Энэхүү наадмаар тус аймгийн Цагаандэлгэр, Луус сумдын М.Цэрэнбат, Ч.Цогтбаатар болон Завхан аймгийн харьяат Д.Галбадрах, Архангай аймгийн харьяат Цогт-Эрдэнэ нарын дөрвөн аймгийн начин төржээ.

Дорнод аймгийн баярт Г.Отгонбаатар түрүүлж аймгийн хурц арслан цолоор шагнуулав
Дорнод аймгийн баяр наадамд Г.Отгонбаатар дахин түрүүлж аймгийн хурц арслан цолоор шагнуулсан бол аймгийн начин Х.Алтансүх үзүүрлэн аймгийн заан цолонд хүрэв. Дорнод аймгийн Сэргэлэн сумын харьяат сумын заан С.Мөнхзоригт шөвгийн дөрөвт үлдэн харцага, Хөлөнбуйр сумын Ганзориг, Халх гол сумын харьяат Э.Баярсайхан, Гурванзагал сумын Д.Булгантамир нарт нутгийнх нь дэвжээ ээлтэй байж аймгийн начин цол хүртэв.

Увс аймгийн наадамд Тэс сумын залуу бөхчүүд үзүүр, түрүүнд үлдэв
Увс аймгийн наадам долдугаар сарын есөнд болсон бөгөөд аймаг, сумын цолтой 256 бөх барилдсан байна. Тус наадамд Тэс сумын залуу бөхчүүд тэргүүн байр булаацалдаж, Х.Оргилболд түрүүлэн аймгийн арслан цол хүртсэн бол Л.Цээсүрэн үзүүрлэн аймгийн заан цолоо баталсан байна. Шинээр, арслан цолтноос гадна аймгийн дөрвөн ч начин төржээ. Тодруулбал, Тэс сумын Л.Балдорж, Зүүнговь сумын Б.Батбаяр, Цагаанхайрхан сумын Т.Мөнх-Эрдэнэ, Т.Юмжаргал нар тав даван аймгийн начны босгыг давжээ.

Сүхбаатар аймгийн баяр наадмаас  заан, харцага 2, начин 3, арслан төржээ
Сүхбаатар аймгийн баяр наадамд аймгийн заан Б.Сэнгэдорж найм даван түрүүлж аймгийн арслан цолонд хүрч, Онгон сумын харьяат "Аварга" дээд сургуулийн оюутан Б.Номиндалай үзүүрлэн харцага цолоо заан болгон ахиулсан байна. Мөнххаан сумын харьяат өнгөрсөн жил начин цол хүртсэн Д.Батболд болон аймгийн начин Б.Зоригтбаатар нар шөвгөрөн аймгийн харцага цолонд хүрчээ. Түүнчлэн тус наадамд Сүхбаатарын хүчтэнүүд одтой барилдан тус аймгаас гурван начин цолтон төржээ. Тухайлбал, Сүхбаатар сумын Б.Өнөбаяр, Наран сумын А.Мөнхбат, Баяндэлгэр сумын Б.Даваажаргал нар тав даван аймгийн начин болжээ.

Дархан-Уул аймагт аймгийн начин Н.Эрдэнэчулуун түрүүлэв

Дархан-Уул аймгийн наадамд аймгийн начин Н.Эрдэнэчулуун түрүүлж аймгийн арслан цол авчээ. Сэлэнгэ аймгийн наадамд Мандал сумын начин Н.Жаргалбаяр түрүүлж арслан болсон бол Б.Эрдэнэбаяр үзүүрлэн заан цолоо баталжээ. Орхон аймгийн баяр наадамд Завхан аймгийн Мандал сумын харьяат аймгийн харцага Б.Уртбаяр түрүүлж арслан болж, Булган аймгийн харьяат аймгийн арслан Гантөмөр үзүүрлэжээ. Булган аймгийн Бүрэгхангай сумын харьяат "Хилчин" спорт хорооны бөх аймгийн начин Д.Тамир нутгийнхаа дэвжээнд түрүүлэн аймгийн арслан болсон бол Өвөрхангай аймгийн бөхийн түрүүг мөн тус аймгийн харьяат Д.Цэрэнсодном авчээ. Өмнөговь аймгийн Булган сумын харьяат Б.Мижидсүрэн аймгийнхаа дэвжээнд түрүүлэн, Баян-сумын харьяат Э.Нямаа үзүүрлэн аймгийн заан болжээ.