Нийслэлийн мэргэжлийн хяналтын газар Эрүүл ахуй халдвар хамгаалалтын газрын улсын байцаагч Н.Одончимэгээс наадмын үеэр гарсан зөрчлийн талаар тодрууллаа.

-Наадмын үеэр гарсан зөрчил дутагдал юу байв?
-Үндэсний их баяр наадмыг угтан Нийслэлийн мэргэжлийн хяналтын газрын 281 тоот тушаалаар батлагдсан төлөвлөгөөний дагуу баяр наадмын бэлтгэл хангуулах үйл ажиллагаанд хяналт шалгалт хийж ажиллалаа. Шалгалтаар илэрсэн зөрчил өмнөх жилүүдтэй харьцуулахад илэрсэн зөрчлийн хувьд нэлээд буурсан. Нийтдээ 213 зөрчил илэрснээс 89 орчим хувийг газар дээр нь арилгуулсан байгаа.
 
-Зөрчлийн дийлэнх хувийг ямар төрлийн зөрчил эзэлж байна?
-Хуушуур хийхээр бэлтгэж хонуулсан мах болон зуурч, эсгэсэн гурилууд хураагдсан. Мөн иргэдийн гар  дээр зөвшөөрөлгүй худалдаалагдаж байгаа өндөг, шарсан зайдас, салат гэх мэтчилэн 1 140 000 мянган төгрөгийн хүнсний бүтээгдэхүүн хурааж, устгалд оруулсан. Гэхдээ өмнөх жилийг бодвол 70 орчим өндөг хураагдсан байна лээ. Тэгэхээр чанарын шаардлага хангаагүй өндөг борлуулах нь багассан гэсэн үг. Мөн баяр наадмын үеэр нийт хүнсний худалдаа, үйлдвэрлэл эрхлэгчдэд хүнсний аюулгүй байдлын чиглэлээр гарын авлага, зөвлөмж тараасан. Мэргэжил аргазүйн зөвлөгөө өгч ажилласан.
 
-Энэ жил нийт хэдэн аж ахуй нэгж, хувь хүмүүст худалдаа үйлчилгээ явуулах зөвшөөрөл олгосон бэ?
-Хүй долоон худагт 166, Төв цэнгэлдэх хүрээлэнд 500 орчим байхаар төлөвлөсөн байсан. Яг хяналт шалгалтын явцад энэ тоо нэлээд нэмэгдсэн байгаа. Үүнтэй холбоотойгоор аж ахуй нэгж, иргэд хоорондын газрын маргааны зөрчил нэлээд гарсан. Бас хяналтын тооноос илүү гарсан учраас цахилгааны тасалдлын асуудал гарсан.  Нэмэгдэж орж ирсэн аж ахуй нэгжүүд манай зөвлөгөө, зөвлөмжид хамрагдаагүй учраас зөрчил гаргах шалтгаан болж байсан. Улмаар манай улсын байцаагч нарын ажлыг хүндрүүлж байгаа явдлууд ажиглагдсан. Ер нь бол ойролцоогоор 60 хувиар зөвшөөрөлгүй газрууд нэмэгдсэн.

-Хөдөө орон нутагт илэрсэн зөрчил юу байна?
-Орхон аймагт баяр наадмын үеэр хүнсний худалдаа үйлдвэрлэл эрхлэх зөвшөөрөл хууль бусаар ашиглаж оролдлого гарсан. Зөвшөөрөлгүйгээр хууль бусаар иргэд гар дээрээс хуушуур, хүнсний бүтээгдэхүүн зарах үйлдэл ч нэлээд байлаа. Үүн дээр цагдаагийн байгууллага, мэргэжлийн хяналтынхан храмтарч ажиллаж дор бүр нь арга хэмжээ авсан.
 
-Цааш цаашдын баяр наадмуудаар баяр наадмын комисс юунд анхаарвал зохимжтой вэ?
-Баяр наадам зохион байгуулах комисст санал болгоход хүнсний чиглэлийн  үйл ажиллага явуулах аж ахуй нэгжүүдэд зөвшөөрөл олгож шалгаруулахдаа Мэргэжлийн хяналтын байгууллагын санал дүгнэлтийг авч байх шаардлагатай байна. Хоёрдугаарт, батлагдсан хяналтын квотдоо багтааж зөвшөөрөл олгож байх шаардлагатай. Хяналтын тооноос хэтрүүлсэн зөвшөөрөл олгосноос болж иймэрхүү зөрчил гарч байгаа юм.

-Хэдий хэмжээгээр хэтэрсэн квот олгосон байна вэ?
-Нийт 900 гаруй аж ахуй нэгж үйл ажиллагаа явуулсан. Тэгэхээр хяналтын тооноос бараг 60 хувиар илүү гарчихсан байгаа юм.

-Зөрчил гаргасан газруудад мөнгөн торгууль тавьсан уу?
-Зөрчил гаргасан хоёр аж ахуй нэгжид 430000 мянган төгрөгний торгуулийн арга хэмжээ авсан.

-Мөн мандат нь дуусчихсан ч гэсэн хураамжаа авсан тохиолдлууд гарсан. Өөрөөр хэлбэл иргэд мөнгөө төлсөн ч үйл ажиллагаа явуулах зөвшөөрөл, мандатаа авч чадаагүй.  Бид энэ үйлдлийг шийдвэрлүүлэхээр Захирагчийн албанд хандаад байгаа.

-Хүй долоон худаг, Цэнгэлдэх зэрэг дээр эмнэлгийн зөөврийн төвүүд ажилласан байгаа. Эдгээр газруудад бас хяналт тавьсан уу?

-Цэнгэлдэх хүрээлэнд 3, Хүй долоон худагт 1 нийтдээ дөрвөн эрүүл мэндийн нэгдэл ажилласан. Хүй долоон худагт 31 хүнд түргэн тусламж үзүүлсэн байна лээ. Ихэвчлэн хүүхдүүд мориноосоо унаж шуу, эгэмний хугаралтай гэх дуудлага ирсэн. Мөн даралт ихсэх, тосондоо түлэгдсэн гэх дуудлагууд ирсэн байгаа. Бид эмнэлгийн тусламж үзүүлж байгаа явдалд анхаарч ажилласан зүйл нь ороох боох материал, эм зэрэг дутагдалтай байгаа эсэх, эрүүл мэндийн шаардлага хангаж байна уу эсэх  дээр хяналт тавьсан. Сайшаалтай нь нэг ч зөрчил илрээгүй.