Ажилласан жил болон тэтгэвэрийн даатгалын шимтгэлийг нөхөн тооцох тухай хууль батлагдаад найман сарын хугацаа өнгөрөөд байгаа билээ.  Энэ хугацаанд 267 мянга 741 хүн нийгмийн даатгалаа төлсөн байна. Хууль болон журамд зааснаар энэ оны наймдугаар сарын 1-ний өдрөөс өмнө иргэд хүсэлтээ гаргасан байх шаардлагатай аж. Хүсэлт хүлээн авах хугацаа дуусахад ажлын 13 хоног үлдсэн байгаа талаар холбогдох албаныхан анхааруулж байна. Энэхүү хууль нь нийгмийн шилжилтийн үед 1990-2000 оныг дуустал 11 жилийн хугацаанд иргэдийн тэтгэвэр тогтоолгох боломжийг бүрдүүлэх зорилготойгоор иргэдэд шинэ боломж бий болгож өгч байгаагаараа онцлог юм. 

Тэгэхээр хуульд зааснаар 1990-1995 оны хооронд ажил хөдөлмөр эрхлээгүй буюу эрхлэх боломжгүй байсан иргэн, 1995-2000 оны хооронд нийгмийн даатгалын шимтгэл нь төлөгдөөгүй буюу төлөх боломжгүй байсан иргэд уг шимтгэлийг нөхөн төлөх бололцоотой болж байгаа юм байна.  Иргэн тухайн үеийн хөдөлмөрийн хөлсний доод хэмжээгээр нийгмийн даатгалын шимтгэлийн өөрт ногдох 10 хувийг нөхөн төлөхөөр таван жилийн шимтгэл 80 мянган төгрөг болох аж. Хуульд зааснаар тухайн оронд мөрдөгдөж байсан хөдөлмөрийн хөлсний доод хэмжээний арван хувийг сард төлнө гэсний дагуу 1995 оны долоодугаар сарын 1-нээс 1998 оны долоодугаар сарын 1-ийг хүртэл хөдөлмөрийн хөлсний доод хэмжээ 9600 төгрөг байсан гэж тооцвол нэг сард 960 төгрөг төлөх юм байна. Мөн хөдөлмөрийн хөлсний доод хэмжээ 1998 оны долдугаар сарын 1-ээс 2000 оны есдүгээр сарын 30-ныг хүртэл 12 мянган төгрөг байсан байна. Энэ хугацаанд ажилгүй байсан хүмүүс сард 1200 төгрөг төлөхөөр тооцогдож байгаа аж. Тиймээс 2000 оны сүүлээр гурван сард тус бүр 1800 төгрөгийн шимтгэл төлөх гэнэ. Ерөнхийдөө 1995-2000 оныг дуустал нийт төлбөрийн зохих шимтгэл 78 мянга 120 төгрөг болж байгаа аж.

Хуулийн хугацаа наймдугаар сарын 1 гэхэд дуусгавар болох учраас иргэд яаравчлах шаардлагатай байна.