Олимпийн аварга Н.Түвшинбаяр  хавдартай хүүхдэд туслахаар кимоногоо дуудлага худалдаанд оруулахаа зарлав. Дуудлага худалдааны эхний үнэ 1 сая төгрөг юм байна.
 Б.Танан хэмээх  4 настай энэхүү өхөөрдөм хөөрхөн охин тархины хавдартай хэмээн оношлогдож өнгөрсөн оны арванхоёрдугаар сарын 20-нд хагалгаа хийлгэсэн.
Охины хавдрыг Монголд эмчлэх боломжгүй учраас Солонгосын  “Samsung medical center” эмнэлэгт эмчлүүлж байгаа. Хагалгааны дараа 6 курс хими эмчилгээг 6-7 cарын турш хийлгэх хэрэгтэй. Одоогоор 4-р курсын эмчилгээ хийгдэж байна. Дараа нь эс шилжүүлэн суулгах эмчилгээг 2 удаа хийлгэнэ.  Энэ эмчилгээг 3 сар тутамд нэг удаа хийх ба өндөр дозын химийн эмчилгээ, эс шилжүүлэх гэсэн 2 хэсгээс бүрддэг юм. Хагалгааны дараах эмчилгээг жил гаруйн хугацаанд хийх ёстой. 2011 оноос хойш Танангийн эцэг эх эдийн засгийн бүх бололцоогоо дайчилсан боловч өдгөө арга мухардан монголчууддаа хандаад байгаа. Учир нь охины  эмчилгээний зардалд 200 сая орчим төгрөг  хэрэгтэй байгаа. Үүнд нэг курс хими эмчилгээний зардал 10 сая вон, 2 курс эс шилжүүлэн суулгах эмчилгээнд 140 сая вон нийт 150 сая вон буюу  195 сая төгрөг шаардлагатай юм.  Тиймээс 4 настай Б.Танан охины эмчилгээний зардалд хандив өргөх сайн дурын хөдөлгөөн улс орон даяар өрнөж байгаа билээ.