НЗДТГ-аас Барилга угсралтын үйл ажиллагаанд хөдөлмөрийн аюулгүй байдал эрүүл ахуйн шаардлага хэрхэн  хангах асуудлыг зохицуулах журмыг гаргасан билээ. Шинээр гаргасан журмынхаа талаар өнөөдөр танилцууллаа.

Журамд барилгын салбарынхны хөдөлмөрийн аюулгүй ажиллагаанд хүлээх үүрэг хариуцлага болон энэ талаар авч хэрэгжүүлэх ажлуудыг нарийвчлан тусгасан байна. Одоогийн байдлаар шинээр баталсан журмыг хэрэгжүүлэх шаардлагыг барилгын компаниудад хүргүүлээд байгаа бөгөөд хэрэгжилт ямар байгааг удахгүй шалгах аж.

 Үүнээс гадна зөвшөөрөлгүй барилгын ажил эрхэлдэг байдлыг таслан зогсоох зорилгоор НМХГ, Нийслэлийн онцгой байдлын газар, Нийслэлийн цагдаагийн газар зэрэг байгууллагуудын хамтарсан ажлын хэсгийн энэ сарын 9-нд байгуулсан байна. Ажлын хэсэг байгуулагдсанаасаа хойш хоёр удаа хуралдаж Улаанбаатарт хичнээн барилга байгууламж зөвшөөрөлгүй баригдаж байгааг судалж үзсэн байна.

Судалгаанаас үзэхэд  нийслэлийн хэмжээнд 36 барилга ямарч зөвшөөрөлгүй баригдаж байгаа гэнэ. Мөн ДШС-нээс өгсөн мэдээлэлээр 98 барилга техник зөвшөөрөлгүй аваагүй байгаа бол Цахилгаан шугам сүлжээнээс техникийн зөвшөөрөл аваагүй нийт 51 барилга байгаа аж. Энэ мэт зөрчилтэй барилгуудын асуудлыг ирэх баасан гараг хүртэл ажлын хэсэг судалж үзээд цаашид  үйл ажиллагаагаа явуулах боломжтойд нь зөвшөөрөл олгож үлдсэн барилгуудын асуудлыг хууль хяналтын байгууллагад шилжүүлэх юм байна.