Шинэ техник технологи нэвтрүүлэх төслийн журам батлагдлаа. Энэ сарын 15-ны өдөр хуралдсан НИТХ-аас  нийслэлд нэн шаардлагатай шинэ техник технологи, ноу-хау нэвтрүүлэх төслийг хэрэгжүүлэх журам гаргасан билээ. Тэгвэл журмыг хэрэгжүүлж эхэлсэнтэй холбогдуулан нийслэлийн ЗДТГ-ын дарга Ё.Гэрэлчулуун сэтгүүлчдэд мэдээлэл хийлээ.   Дээрхи төсөл нь  иргэдийн  санаачлагаар шинэ техник технологи, ноу-хау нэвтрүүлж нийслэлийн хөгжилд тулгамдсан асуудлыг шийдээд зогсохгүй иргэдэд эд хөрөнгө бий болгох зорилготой юм.

Төслийг хэрэгжүүлэх журам нь долоон зүйлтэй бөгөөд төсөл хэрэгжүүлэгчдийн зээлийн асуудлыг ямар нэг хүү, алдангигүйгээр шийдвэрлэхээр журамд тусгасан байна. Мөн төсөл хэрэгжүүлэх хүсэлтэй гадаад, дотоодын хуулийн этгээд нь шинэ техник, технологи нэвтрүүлэх төслийг холбогдох албаныханд танилцуулж үнэхээр үр ашигтай нь тогтоогдвол тухайн орон нутаг өөрийнхөө өмч болгон авч төсөл хэрэгжүүлэгчдийн оруулсан хөрөнгө оруулалтыг буцаан төлөхөөр болж байгаа юм.  

Үүнээс гадна төсөл хэрэгжүүлэгч нь төслийн явцад үүсэх бүх эрсдлийг өөрөө хариуцаж байгаа бөгөөд хэрэв шинээр нэвтрүүлсэн техник технологи нь тодорхой үр дүнд хүрээгүй  тохиолдолд нутгийн захиргааны байгууллага хүлээн авахгүйгээр барахгүй хөрөнгө мөнгө нь эргэн төлөгдөхгүй юм байна.