Манай улсад ганц байдаг зайн туяа эмчилгээний аппарат өнгөрсөн зургадугаар сард эвдэрч, энэ чиглэлийн эмчилгээ зогсчихсон талаарх мэдээллийг бид өмнө нь хүргэж байсан билээ. Тэгвэл аппаратыг саяхан зассан боловч долоо хоногийн дараа дахин эвдэрсэн байна.

Тодруулбал туяа эмчилгээний  "Tere­gam" аппа­ратын удирдлагын гар нь ашиглаг­дах боломжгүй болсон аж. Ингэж олон удаа эвдэрч байгаагийн шалтгаан нь хэт их ачаалалтай ажилсантай холбоотой гэнэ. Бусад оронд энэ аппаратаар өдөрт 25-35 өвчтөн үйлчлүүл­дэг байхад манайд дунд­жаар 90, зарим­даа бүр 100 өвчтөн эмчлүүлдэг байна. Тэгэхээр ачааллаа даахгүй эвдрэх нь арга­гүй гэдгийг албаны хүн нь хэлж байгаа юм. 

Уг нь энэ эвдэрчихсэн удирд­лагын гар нь 1620 еврогийн үнэтэй юм аж. Харин Эрүүл мэндийн яамнаас төсөв мөнгө байхгүй гэдэг шалтгаанаар аппаратыг засч чадахгүй гэж байгаа гэнэ.

Тус аппаратыг Монгол Улсын Засгийн газрын хэрэгжүү­лэгч агентлаг Цөмийн энергийн комисс олон улсын Атомын энер­гийн агентлагтай хамт­ран ажиллаж туяа эмчилгээ­ний чанарыг сайж­руулах талаар төсөл хэрэгжүүлжээ. Энэ төслийн хүрээнд 2005 онд Чех улсын "ЮЖП Праг"  үйлдвэрт үйлдвэрлэсэн зайн туяа  эмчилгээ­ний "Teregam" аппаратыг суури­луулж  2006 оны дөрөвдүгээр сард эм­чил­гээнд хэрэглэж эхэлсэн байна.

Сүүлийн жилүүдэд ма­най улсын хэмжээнд  хорт хавдар ихэсч, эмчлүүлэгч­дийн тоо өссөөр байгаа. Энэ үед Монголдоо ганц гэгдэх туяа эмчилгээний аппаратыг нэн даруй засахгүй бол өвчтэй, хорт хавдартай олон хүн хохирч байгаа гэдгийг эмч нар хэлж байна