Монгол улс анхны салхин ферм өнгөрсөн сарын 20-нд ашиглалтад орох талаар барууны хэвлэлүүд мэдээлж байсан. Арабын хамгийн том агентлаг “Al Jazeera” телевизийн суваг ч манай улсад ирж энэ үйл ажиллагааны талаар сурвалжилжээ. Тэд байгаль орчин, ногоон хөгжлийн сайд С.Оюунтай уулзаж санал бодлыг нь сонссон байна. “Al Jazeera” Монголын сэргээгдэх эрчим хүчний хөгжийн талаар хэрхэн мэдээлснийг хүргэе.

Нийслэл хотын агаарын бохирдлыг бууруулах зорилгоор 122 сая ам.долларын өртөгтэй баригдсан “Салхит” ферм Монгол улсад сүүлийн 30 жилд баригдсан хамгийн том үйлдвэр юм. Байгальд ээлтэй “Салхит” ферм Улаанбаатараас 70 км-т орших Төв аймгийн нутагт байрлаж байна. Уг ферм нь жилд 150 мянган тонн нүүрс, 1.6 сая тонн усыг хэмнэхээс гадна 180 мянган тонн нүүрсхүчлийн хийг үгүй хийх чадалтай юм.

Энэхүү төслийг “Newcom” группын “Clean Energy” компани гүйцэтгэж байгаа аж. Монгол улс 2020 он гэхэд эрчим хүчнийхээ 20-25 хувийг сэргээгдэх эрчим хүчнээс авахыг зорьж байна. Гэхдээ “Newcom” группын хэвлэлийн төлөөлөгчийн мэдээлэл ихэд анхаарал татсан юм. Түүний ярьснаар Монгол улс Өмнөговь аймагтаа л гэхэд БНХАУ-ыг бүхэлд нь эрчим хүчээр хангаж чадахуйц салхины нөөцийн эх үүсвэртэй гэсэн юм.

Азийн хөгжлийн банкны мэдээлснээр Монгол улс нь Азийн улсуудаас салхины хамгийн их эх үүсвэртэй орон гэжээ. Энэхүү нөөцийн хэмжээг 1.1 триллион ваттс хэмээн тооцоолдог. Хэрвээ анхны салхин фермийн үйл ажиллагаа амжилттай хэрэгжиж, тооцоолсон ёсоор эрчим хүч үйлдвэрлэж чадах юм бол дараа дараагийн үйлдвэрийг барих нь тодорхой билээ.

Японы “Softbank” корпораци ч мөн Монголд баригдахаар төлөвлөгдөж буй 300 сая ваттсын эрчим хүч үйлдвэрлэх зарим салхин паркт 626 сая ам.долларын хөрөнгө оруулахаар шийдсэн байна.

Уул уурхай, эдийн засгийн хөгжлөөрөө дэлхий нийтийн анхаарлыг татаж буй Азийн үндэстний шинэхэн фермийн төсөл амжилттай хэрэгжвэл дэлхийн хамгийн их агаарын бохирдолтой хот Улаанбаатарын утаа ч багасна гэж найдаж байна.