Өнөөдөр Уул уурхайн яамнаас мэдээлэл хийлээ. Манай улс 2016 онд газрын тосны бүтээгдэхүүний хараат байдлаас гарах боломжтой гэдгийг хурлын үеэр албаныхан дуулгалаа.

Газрын тос боловсруулах ажлын хүрээнд манай улс Японы талтай хамтарч ажиллаж байгаа бөгөөд бүтээгдэхүүн боловсруулах үйлдвэрийн техникийн зураг төслийг хийх ажлын гэрээнд өнгөрсөн тавдугаар сард гарын үсэг зурцгаажээ. Одоогийн байдлаар инженерийн тооцоо судалгааны ажлуудыг хийж байгаа гэнэ. Тус үйлдвэр ашиглалтад орсноор Монголд олборлосон газрын тосыг бүхэлд нь боловсруулах боломж бүрдэх юм байна.

Түүнчлэн Орос болон Хятад улстай газрын тосны солилцоо хийхээр хэлэлцээр хийж байгаа аж.

Мөн манай улс шатахууны хангалттай байгааг онцоллоо. Цаашид газрын шатахууны үнийг хэвийн хэмжээнд барьж тасалдуулахгүйн үүднээс нөөцийг сайн бэлтгэсэн гэв. Одоогийн байдлаар улсын нөөцөд 12700 тонн шатахуун байгаа аж. Энэ хэмжээ нь 42 хоногт хүрэлцэхүйц хэмжээ юм. Түүнээс гадна шатахуун импортлон худалдаалагч компаниудын нөөц улсын хэмжээнд хангалттай хэмжээнд байгаа гэнэ. А-80 бензин 41 хоногийн нөөцтэй бол Аи-92 58 хоног, дизелийн түлш 31 хоног, ТС-1 буюу онгоцны түлш 38 хоногийн нөөцтэй аж.