Шударга өрсөлдөөн хэрэглэгчийн төлөө газраас /ШӨХТГ/ сурагчийн дүрэмт хувцастай холбоотой иргэдээс ирсэн гомдлын талаар сэтгүүлчдэд мэдээлэл хийлээ. Энэ үеэр ШӨХТГ-ын дарга О.Магнайгаас зарим зүйлийг тодруулав.

-Энэ жилээс сурагчийн дүрэмт хувцасны үнэ хоёр дахин өссөн. Энэ асуудлаар иргэдийн гомдол санал ирж байна уу?

-Манайх эцэг эхчүүдээс ирсэн гомдлын мөрөөр БШУЯ болон ҮХААЯ-ынхантай уулзсан. Сурагчийн дүрэмт хувцсыг долоон компаниар хийлгэх гэрээг нь Өрсөлдөөний тухай хууль зөрчсөн гэж үзэж байгаа.  Тиймээс дээрх гэрээгээ өөрчлөх, эргэн харах, Өрсөлдөөний тухай хуулийн дагуу сурагчийн дүрэмт хувцас нийлүүлэхэд анхаарах хэрэгтэйг холбогдох хүмүүст сануулаад байна. Үүнийг дагуу яг одоо явуулж байгаа гэрээгээ зогсоо гэсэн шаардлагыг хүргүүлж байгаа.

-Сурагчийн дүрэмт хувцасны материалтай танилцсан уу?

-Надад даавууных  нь хэлтэрхийнээс өгсөн л дөө. Мэргэжлийн хүний нүдээр биш ч энгийн хүний нүдээр харахад чанарын ялгаа харагдахгүй байсан. Өөрөөр хэлбэл, сурагчийн дүрэмт хувцас чанарын хувьд өмнөхөөсөө ялгарах юмгүй санагдсан.

- Тэгэхээр долоон компанийг сонгон шалгаруулалтайгаар сонгох шаардлагыг хүргүүлээд байгаа гэж ойлгож болох уу?

-Ямар ч байсан энэ үйл ажиллагааг эхний ээлжинд зогсоочихлоо. Яг одоо оёж арай эхлээгүй. Гэрээ хийх шатандаа явж байна. Бид нар ямар ч байсан гэрээ хийх шатыг зогсоогоод, сонгон шалгаруулалтыг хуулийн дагуу явуулж, хямдхан чанартайг нь сонго гэсэн шаардлага хүргүүлсэн. Мэдээж нэг нөхцөл байх ёстой. Энэ нь монгол оёдолчдоор оёулах.  Хятадад хямдхан оёулж оруулж ирж болохгүй шүү дээ.

-Дунд сургууль тарахаас өмнө сурагчдаас очиж биеийн хэмжээ авчихаад байгаа. Тэгэхээр гэрээ байгуулахаасаа өмнө хүүхдүүдээс хэмжээ авсан байна гэдэг зохион байгуулалттай үйлдэл биш үү?

-Бүх хүүхдээс хэмжээ авна гэж байхгүй. Ерөнхий дундаж хэмжээг авч байгаа. Тэгэхээр гэрээ хийж байгаа байдлыг эхний ээлжинд зогсоох шаардлагыг хүргүүлсэн учир дахин сонгон шалгаруулалтайгаар уг ажил эхэлнэ гэсэн үг.

-Хэрвээ танай шаардлагыг хүлээж аваад дүрэмт хувцас оёх ажил удааширвал есдүгээр сарын 1-н гэхэд сурагчид дүрэмт хувцастай болж чадах уу?
-Одоо хоёр дахин өндөр үнээр авч байснаас жоохон хүлээгээд боломжтой үнээр нь авбал зүгээр байх.

-Орон сууцны үнэ өсөөд байна гэж байгаа. Энэ дээр танай байгууллагад ямар нэг гомдол санал ирсэн үү?
-Орон сууцны үнэ өсч байна гэсэн мэдээллийн дагуу бид хоёр удаа шалгалт хийсэн. Яг үнээ нэмсэн барилгын компани 1-2 байсан. Тэр компаниудад хариуцлага тооцох, Засгийн газрын хөтөлбөрөөс хасах асуудлыг Ерөнхий сайдын түвшинд ярьсан. Одоогоор иргэд орон сууцны үнэ нэмэгдэж байгаа тал дээр хөөсрүүлээд байна. Яг тодорхой энэ орон сууц, барилгын компани хэдэн төгрөгөөр үнээ нэмсэн байна гэсэн гомдол өнөөдрийн байдлаар ирээгүй байна.

-Ирэх сараас цахилгааны үнэ нэмэгдэнэ гэж байгаа. Энэ дээр ямар байр суурьтай байна?

-  Үнэндээ эх орон маань цахилгааны хувьд хүндрэлтэй байна. Яг энэ үед ард түмэн маань хоёрхон жил "бүсээ чангалаад" цахилгаанаа хэмнэх хэрэгтэй байгаа юм. 150 квт-аас доошоо бол хуучин үнээрээ явж байгаа. Тэгэхээр цахилгаанаа хэмнэвэл үнэ нэмэгдэх үндэслэлгүй. 2015 оноос манай эх үүсвэрүүд ашиглалтанд ороод эхлэхээр энэ өсөлтийг буулгаж болно шүү дээ.

-"Хүчит шонхор" захын хувьд зөрчлөө арилгая гэсэн хүсэлтийг нь яагаад хүлээж аваагүй вэ?

-Бид гурван удаа сануулга өгсөн, шаардсан. Гэтэл шаардлагын дагуу арга хэмжээ аваагүй. Тиймээс 110 сая төгрөгийн торгуулийг хэвээр үлдээхээр болсон. Тус захын удирдлагууд түрээсээ хууль бусаар нэмсэн, түрээс нь харилцан адилгүй байсан нь Өрсөлдөөний тухай хуулийг зөрчсөн. Нэгэнт давамгай байдалтай байгаа компаниуд урьдынх шигээ дураараа авирладаг байдалтай хатуу тэмцэнэ.

- “НИК” компанитай үүсгээд байсан заргаа авч чадсан гэсэн үү?

-Шатахууны үнийг судалгаагүйгээр өсгөснөөс болоод хомсдол үүсгэсэнд “НИК” компанид манайхаас 4,9 тэрбум төгрөгийн торгууль ногдуулсан. Шүнийг тус компани хүлээн зөвшөөрөхгүйгээ илэрхийлж, шүүхэд хандаад байсан. Харин Улсын дээд шүүхээс өмнөх шатны шүүхээс гарсан шийдвэрийг үндэслэж “НИК” компанид тавьсан торгуулийг үндэслэлтэй гэж үзсэн. Ер нь бол торгууль тавьдаг. Тэр нь шүүхээр явж байгаад сураггүй болдог гэсэн ойлголттой болоод байгаа. Тэгвэл энэ бүхэн арилсан. Ямар ч байсан шүүхээр яваад нааштай шийдвэр сонслоо.

- “НИК” компани хяналтын шатны шүүхэд хандахгүй бол энэ мөнгө "хаана очих" вэ?

- 4,9 тэрбум төгрөг ойрын хугацаанд улсын төсөвт орно.

-Өнөөдрийн байдлаар танайх хэчнээн асуудлаар шүүхэд хандаад байгаа вэ?

 -Яг өнөөдрийн байдлаар ШӨХТГ 10 гаруй асуудлаар шүүхэд хандаад байгаа. Зохиомол хомсдол үүсгэж үнэ нэмсэн хэмээх үндэслэлээр ногдуулсан 17 тэрбумын асуудал эхний шатанд төлүүлэх нь зүйтэй гэдэг шийдвэр гарсан. Өөрөөр хэлбэл, “Сод Монгол” компани зохиомол хомсдол үүсгэснээ хүлээн зөвшөөрч 10 сая төгрөгийн торгууль төлөөд байгаа. “Шунхлай” компанийн хувьд шүүхийн шатандаа явж байгаа.

-Хөдөө орон нутгуудад хяналт шалгалт хэр явагдаж байна. Хэр хүрч ажиллаж байна?

-Орон нутагт бүгдэд нь хүрч ажиллах боломж байдаггүй. Тиймээс 21 аймагт Шударга өрсөлдөөний байгууллага нээе гэсэн хүсэлтийг гаргаад байгаа.

-Арилжааны банкуудын шимтгэлийн асуудалд иргэд одоо ч бухимдалтай байдаг. Энэ асуудлын шийдвэрлэлт хэр явагдаж байна?

-Арилжааны банкуудын шимтгэлийн асуудал нааштай шийдэгдэхгүй байсаар шүүхэд шилжсэн.