Цусны хорт хавдрын өвчтэй хүүхдүүдэд зориулсан шинэ эмнэлэг есдүгээр сарын 21-нд ашиглалтанд орох гэж байна.

Тус эмнэлэгийг АНУ дахь Төвд Монголын шашин соёлын төвийн тэргүүн Ажиа гэгээний санаачлагаар барьж байгаа бөгөөд барилгын шавыг 2012 оны 5 сарын 9-нд тавьж байжээ.

 Тэгвэл тус эмнэлэгийн барилгын эхний хэсэг Ажиа гэгээний төрсөн өдөр буюу ирэх есдүгээр сарын 21-нд нээлтээ хийх юм байна. Харин сүүлийн хэсэг нь оны өмнөхөн ашиглалтанд орж тус эмнэлэг бүрэн ажиллаж эхлэх юм байна. Эмнэлэгийн барилгын ажлыг "Тэргүүн Чинсай" барилгын компани гүйцэтгэж байгаа бөгөөд оноос өмнө ашиглалтад бүрэн оруулна гэдгээ албан ёсоор мэдэгдлээ.

Шинээр баригдаж буй хүүхдийн цусны эмгэг, хавдрын эмнэлэг нь нийтдээ 4 тэрбум 1 сая төгрөгийн өртөгөөр босч байгаа  бөгөөд долоон давхар байх гэнэ. Тус эмнэлэг нь 50 ортойгоор үйл ажиллагаагаа явуулах юм байна. Мөн цусны өвчнийг эмчлэх, илрүүлэх орчин үеийн тоног төхөөрөмжөөр бүрэн тоноглогдсон байх юм байна. Тус эмнэлэгийг барихад АНУ, Япон, Англи, Тайвань зэрэг орнуудад ажиллаж, амьдарч байгаа монголчууд болон гадны олон хүмүүс мөнгө, санхүү, багаж, тоног төхөөрөмжийн хандив өргөж байгаа аж. Мөн энэ сайн санааны үйлсэд нэгдэн туслалцаа үзүүлэхийг Ажиа гэгээнтэн уриалсан юм.

Хэрвээ та цусны хавдраар өвчилж байгаа хүүхдүүдэд туслахыг хүсвэл Голомт банкны 1105046505, Худалдаа хөгжлийн банкны 4525655325 дансаар хандиваа өргөөрэй.

Одоогийн байдлаар манай улсад Эх нялхсын эрдэм шинжилгээний үндэсний төвд л цусны өвчтэй хүүхдүүдийг эмчилдэг бөгөөд улсдаа ганц тус эмнэлэг маш их ачаалалтай байдаг байна.

Одоогоор ЭНЭШТ-т цусны хорт хавдартай, эмчийн хяналтад байдаг 700 гаруй хүүхэд байдаг байна. 2009 онд цусны хавдрын 18 шинэ тохиолдол бүртгэгдэж байсан бол 2010 онд 24, 2011 онд 33 болж өсчээ. Энэ тоо өнөөдөр хэд болж өссөнийг хэлэхэд бэрх. Тиймээс өвчиндөө шаналах хүүхдүүдийг тухтай орчинд эмчлэх, сэтгэл санааны  дэм өгөх нь хамгийн чухал байгаа юм.

Тиймээс тус эмнэлэгийг босгоход маш их мөнгө хэрэг болж байгаа учир хүмүүсийн хандив хэрэгтэй байгаа гэдгийг  Ажиа гэгээнтэй онцолж байна.

Ажиа гэгээнтэн нь Өвөрмонголын Хөх нуурын монгол хүн аж. Улс төрийн асуудлаар улсаасаа явж 1998 оноос хойш Америкт цагаачилж амьдарч байгаа бөгөөд 2006 онд анх удаа Монголд айлчлах үедээ тус эмнэлэгийг барих санаачилгыг гаргажээ.