ҮХААЯ-ны Төрийн нарийн бичгийн дарга Х.Золжаргал сүүлийн үед цахим сайтаар гарсан ташаа мэдээлэлд залруулга өгсөн юм. Оёдлын 68, сүлжмэлийн 48, хялгас ялгах найм, ээрэх зургаа, нийт 130 үйлдвэр сурагчийн дүрэмт хувцас үйлдвэрлэх үйл ажиллагаанд оролцож байгаа гэнэ. Ноосны үйлдвэрийн холбооныхон монгол хонины ноосыг ээрч, даавуу үйлдвэрлэснээр улсынхаа цэрэг, цагдаа, сурагчийн дүрэмт хувцсыг даавуугаар хангах боломж буйг харжээ. Ингээд үндэснин 130 үйлдвэрийн нэгтгэж, хонины ноосоор дүрэмт хувцас үйлдвэрлэх гараагаа сурагчийн дүрэмт хувцсаар эхэлсэн ч шүүмжлэл дагуулж буй аж. Гэхдээ энэ ажил жигдэрвэл 20 тэрбум төгрөгийн монгол хонины ноосыг 250 тэрбумын үйлдвэрлэл болгох бүрэн боломжтой гэж Х.Золжаргал онцлов. Тэрбээр “Өнгөрсөн даваа гаригт ШӨХТГ-аас сонгон шалгаруулалт хийхгүй оёдлын үйлдвэрийг сонгосон нь Өрсөлдөөний тухай хуулийн 13 дугаар зүйлийг зөрчсөн байна гэж үзэн акт ирүүлсэн байна. Тиймээс энэхүү актыг хуулийн мэргэжилтэнтэй хянаад зөрчсөн байвал залруулна. Гэхдээ сурагчийн дүрэмт хувцсыг 130 үйлдвэр оёдгоороо оёно. Улсын төсвийн мөнгөөр бараа, ажил үйлчилгээ худалдан авахдаа тендер зарладаг. Бид бол улсын төсвийн хөрөнгөөр ямар ч зүйл худалдаж аваагүй тул сонгон шалгаруулалт хийгээгүй. Чингис бондын хөрөнгөөр ноолуурын үйлдвэрүүдийн тоног төхөөрөмжийг шинэчилнэ. Үнийн хувьд сурагчийн дурэмт хувцас таван иж бүрдлээс бүрдэж байгаагаас гадна монгол ноосон даавуугаар үйлдвэрлэж буй тул өртөг өндөр байгаа. Гэхдээ олон хүүхэдтэй айл, эмзэг бүлгийн өрхүүдэд Халамжийн сангаас, төлбөрийг гаргуулах, зарим хувцасны үнийг хөнгөлөх, бэлэглэх зэргээ асуудлыг шийдвэрлэнэ” гэв.