Энэ сарын таван буюу ирэх даваа гарагт Унгарын нийслэл Будапешт хотноо зохиогдох туялзуур сэлэмний дэлхийн аварга шалгаруулах тэмцээнд манай найман тамирчин оролцоно. Багийн ерөнхий дасгалжуулагчаар  Д.Ганбаатар  ажиллаж байгаа бөгөөд тэмцээнд оролцох тамирчдыг МТС-ний холбооноос чансаагаар нь жагсаан тодруулжээ.

Тэмцээн туялзуур сэлэмний хүнд, хөнгөн гэсэн хоёр төрлөөр явагдах юм. Үүнээс эрэгтэйчүүдийн хүнд сэлэмний төрөлд Б.Баттөмөр, Б.Батхүү, Ц.Жигжидсүрэн нарын тамирчид оролцох бол хөнгөн сэлэмний төрөлд Э.Дөлгөөн өрсөлдөнө. Харин эмэгтэйчүүдийн туялзуур сэлэмний төрөлд Б.Гэрэлмаа, Э.Орхон, Б.Цолмон, Ю.Ариунзаяа нарын тамирчид хурд хүч авхаалж самбаагаа сорино.

Мөн манай туялзуур сэлэмчид  энэ жил Кувейтэд болох залуучуудын Азийн аварга шалгаруулах тэмцээн болон “Тяньжин 2013” Зүүн Азийн наадамд оролцохоор төлөвлөөд байна.

Дэлхийн сонгодог спортуудын нэг туялзуур сэлэмний спорт нь XVI зууны үед баруун Европ тивд үүссэн бөгөөд түүнээс хойш урлаг, бие хамгаалах урлагийг хослуулан хөгжсөөр өнөөгийн боловсронгуй хэлбэрийг олсон байна. Энэ спорт 1896 оны  анхны олимпын наадмаас хойш  зохиогдсон бүх олимпийн наадмын албан ёсны хөтөлбөрт багтсаар ирсэн юм.

Туялзуур сэлэм нь манайд богино хугацаанд эрчимтэй хөгжиж байгаа спортуудын  нэг бөгөөд анх 2009 онд Монголын туялзуур сэлэмний холбоо байгуулагдан дотоодод олон тэмцээн уралдаан зохион байгуулсаар байна.